今日傍晚大約7點，東涌新盤昇薈宣佈20間過千呎嘅三房同四房單位減價至少一成、最多12%，一個晏晝入市買昇薈嘅人即時遭受無妄之災，相信今晚佢分分鐘喊濕幾個枕頭。

事緣佢今日用1,775萬買咗昇薈一間中層B室四房單位，呎價大約1.25萬元，大約2點就完成交易喇。點事隔咗半日，發展商突然之間就話減價喇，將佢樓上兩層，面積、座向一模一樣既單位減價12%，扣晒所有折扣之後，折實售價1,593萬元。

變相黎講，如果呢名不幸買家，遲多幾個鐘、睇定啲先入市，就可以慳多182萬買到個更加靚嘅單位。