香港政壇久旱逢甘霖，唔少人日望夜望今日快啲到，事關45條關注組今日終於正式創黨，主席及黨魁等人選亦會正式誕生，通勝話今日宜會友、立約，相信公民黨搵過高人指點先擇吉開張，食四方飯嘅政務司司長肥龍最識做，打算第一時間送個花籃道賀，但核心成員湯家驊話「咪住」，唔通因政改方案流產仍有嫌隙？梗唔係啦，只係公民黨想等總部正式入伙先舉行創黨大典，到時大家齊齊開香檳都未遲。

入公民黨要求嚴格

市民對公民黨寄望甚殷，講到底都係人心思變，當今政壇之內，由政府高官到立法會議員，都喺八、九十年代蒲頭，八六年成立嘅民協已創立二十年；民建聯九二年創黨；自由黨亦有十三年歷史；民主黨一直被打壓，都撐咗十二年。自民聯、港進聯完成歷史任務人間蒸發，親台嘅「一二三民主聯盟」亦已收檔，鬼婆陸恭蕙九七年創立嘅民權黨，原來仍然存在，現任黨主席係王中介，有冇人知佢係乜水？
公民黨入黨要求嚴格，有人戲言難得過入中共？中共入黨嘅程序確係幾多手續──先要獲兩名黨員介紹，填妥入黨志願書，再經上級批准同經過一年觀察期先能夠正式做黨員，更「啃」嘅係入黨宣誓時要講「隨時準備為黨和人民犧牲一切，永不叛黨」。台灣民進黨入黨手續比較簡單，只需獲一個黨員介紹，填表交黨費三百蚊台幣（約七十二港元）就掂。


爆料熱線：29290000、27860099
報料傳真：26239278
報料電郵：[email protected]