有咁啱得咁蹺,買完唱片,同時收到林振強太太送嚟一本書,就係林振強嘅《又喊又笑》。林太手寫幾隻字:「多謝你稱先夫振強為『特殊奇才』,附上《又喊又笑》作紀念!」真係受之有愧。左丁山以前與林振強只係見過兩三次面,交談只有一句,對佢之認識全部來自佢嘅專欄。睇完佢家姐林燕妮嘅序言,先知道呢位「特殊奇才」嘅成長過程既奇特又少有,若非佢嘅父母姊妹嘅容忍性,天才老早俾人連根拔起,但話得說回來,若非個人才能獨特,就冇資格學林振強嗰種「怪人奇行」咯。今日社會上好多邊緣少年故意逃避、扮嘢、不務正業,請佢哋買本《又喊又笑》,睇吓自己有冇資格學林振強先。
如此奇才,三十年唔逢一閏,林夕講得好:「歌詞界的達文西,集七種天才腦袋於一身,聲情並茂說故事,放下包袱,開創一代語言。紀念林振強,能做嘅嘢唔多,聽吓佢填詞嘅《追憶林振強》,睇吓《又喊又笑》,不失為最佳方法,睹物思人,亦不勝唏噓。