英國愛德華王子喺九月二十七日出席沙田馬會會所四樓嘅宴會,馬會主席夏佳理招待貴賓,據夏主席對賓客講,佢對「精英大師」好有信心,已經休息足夠,可以贏得!不過一位對日本賽馬(日本人稱為競馬)有認識人士講,日本馬圈唔想外人贏,每每合作送「包廂」畀外來馬坐,等佢冇得突圍,又或者提早要啲馬出沙圈,行到啲外來馬索氣,周身大汗,精神緊張先至入閘,如果要喺日本贏頭馬,除咗實力外,要有幸運之神眷顧。
跑馬就係要講運,度度一樣。香港兩匹馬,「精英大師」與「好望角」會成為大熱門、次熱門,如果一Q返嚟,香港威晒,日本面目無光,世事冇咁簡單嘅,馬主W話如果「精英大師」抽到好籤排內檔,有資格由頭放到尾;抽到大外檔就頭痛,因為賽道係出閘不久就轉急彎,外檔馬會「篩」出去,非常不利,而且直路長,有暗斜,後追比較吃力,但就適合「好望角」嘅跑法。
左度右度,除非「精英大師」排第十三檔以外,都係買「精英大師」,打電話叫肥仔K喺東京入馬場代為落注,希望東京賠率會好啲。點知肥仔K話唔知中山競馬場喺邊,唔識去!但佢睇到東京馬經報紙,話唱得「精英大師」好好喎。