懷孕6個月嘅鍾嘉欣今日喺尖沙嘴，以用家身份出席田原香滴雞精產前講座，身穿短裙嘅嘉欣，着咗一對3吋高踭鞋，今日所見，嘉欣已經明顯見肚，影相嘅時候，嘉欣喺肚擺出心心手勢。

嘉欣笑言：「BB知道今晚飛返加拿大，所以出嚟見下大家，好開心呀！我嘅心情今日有啲唔同，眨吓眼我留喺香港已經兩個星期，呢個係last一個活動，要相隔1年時間先再見大家，有啲唔捨得，但係我又好期待見個女（Kelly)同老公，頭先facetime個女，可能佢知我返嚟，佢笑呀，平時佢多數喊，老公唔想收線，因為我收線，個女就喊，我話20小時後就見到我。」如日後有可觀酬勞嘅活動邀請佢，會唔會考慮返香港出席？嘉欣二話不說：「唔會！要生B喇，祝我生產順利，因為永遠唔知生產過程係點，生死關頭，一線之差，所以做媽媽係好偉大，希望大家祝福我。」

問到今胎順產定開刀？嘉欣表示：「我希望順產，我生第一胎用咗17個鐘，啲人話第二胎用15至20分鐘就生到，希望快啦，不過唔好快到喺車上面生，我已經叫老公準備。」嘉欣仲指老公會陪入產房，幫手剪臍帶同錄影。

問到BB嘅性別，嘉欣話：「我叫醫生唔好講俾我知，我覺得呢個BB好乖，好旺我，好識幫我賺錢，好溫柔，唔似Kelly拳打腳踢。」

想生BB嘅李亞男係咪有向嘉欣請教？嘉欣笑住話：「我生完Kelly之後，就變咗一個營養師，因為我會睇書，同朋友傾自然療法嘅嘢，學習健康知識，o依家啲朋友都叫我做Doctor Chung，有乜頭暈身㷫、生痔瘡，都會搵我。」問佢有咩食療可以分享？佢話：「維他命、滴雞精、飲鹼性水，提升免疫力，我坐月就跟足傳統，例如食薑飯。」

精選娛聞，喺晒《娛果》
http://fb.com/appledailyent