隔牆有耳：
奪命雞 杜Sir向民望高開拖 - 李八方
蘋果日報 2015/01/01 05:20
隔牆有耳
杜Sir噚日去九龍城街市揀冰鮮雞，雞檔老闆見到杜Sir真人好開心。 夏家朗攝
因為禽流感，噚日又有一批雞被銷毀奪命，市民冇活雞食，惟有轉食冰鮮雞。拍過《奪命金》嘅導演杜琪𥧌，噚日大除夕上午現身出咗名最多名人出沒嘅九龍城街市，親自去雞檔揀冰鮮雞，最後捧走兩隻過除夕，佢仲提早為食物及衞生局局長高永文開年，話民望高𢭃咁高人工，唔該諗吓辦法解決冇活雞食嘅問題！
查實八方都估唔到，會喺街市撞到杜Sir㗎。佢話自己查實唔一定要喺除夕食雞，但最後都用咗兩百蚊，買咗兩隻冰鮮雞、雞腸同雞雜返屋企，佢仲一手抽住兩隻雞，一邊教路八方，話用冰鮮雞係整唔到白切雞嘅，只能夠整吓豉油雞呀、炸吓或者炆吓咁。生意慘淡嘅雞檔阿姐見到杜Sir親自幫襯都笑番晒，透露杜Sir喺度買雞買咗廿年，但多數係杜太買嘅，今日見到杜Sir真人都超開心。
問到過年都冇活雞食，杜Sir都話梗係冇咁好啦，但為咗大眾安全着想，覺得停售活雞都冇辦法嘅。到底驚唔驚禽流感？佢即刻話：「有咗咁多年啦，有乜好擔心，係高永文要擔心吓啦。」點解向民望高開拖？佢話呀，市民食新鮮雞係傳統，如果政府想全面放棄出售活雞，要一步一步慢慢做，「唔得咪政府自己諗辦法囉，畀咁多錢人工佢做咩呀？」既然次次都係內地活雞出事，佢仲贊成本地同內地活雞分開處理，「香港還香港，大陸還大陸，河水不犯井水」，估唔到連講雞，都咁有政治意味。
問到過年都冇活雞食，杜Sir都話梗係冇咁好啦，但為咗大眾安全着想，覺得停售活雞都冇辦法嘅。到底驚唔驚禽流感？佢即刻話：「有咗咁多年啦，有乜好擔心，係高永文要擔心吓啦。」點解向民望高開拖？佢話呀，市民食新鮮雞係傳統，如果政府想全面放棄出售活雞，要一步一步慢慢做，「唔得咪政府自己諗辦法囉，畀咁多錢人工佢做咩呀？」既然次次都係內地活雞出事，佢仲贊成本地同內地活雞分開處理，「香港還香港，大陸還大陸，河水不犯井水」，估唔到連講雞，都咁有政治意味。