方健儀、許廷鏗、黃修平、鍾景輝今午到炮台山出席Roadshow舉辦頒獎禮，獲頒最愛藝術文化大獎。

方健儀去年開始獨立發展，主持、唱歌機會不乏，佢話:「踏入2016年十八日，之前攞咗100毛獎項，今日又有獎攞，好似發夢咁意料唔到，最初以為大會搵我係做司儀，冇諗係坐上客得獎者。」經過一年自由發展後，應該密密賺好過只在大台做主播，方健儀笑笑口話:「司儀好季節性，比以前好啲啲啦，足以糊口，夠供樓就得，我唔係要賺好多，唔使好奢華。」方健儀話最初跳出嚟自由身未太適應，依家已經操控好自己，可以有生活質素模式。

近日周子瑜被黃安舉報宣揚台獨及道歉事件引起中港台韓等地哄動，曾為新聞從業員方健儀話:「有睇報導，但冇深入研究來龍去脈，依家網絡世界成熟，出嚟一言一行，公眾會監察睇住，奧巴馬曾經在校園演講時話過，要擺嘢、講嘢放上社交網要小心，將來有機會畀人攞返出嚟，周子瑜事件我唔評論，但對奧巴馬講嘅說話我好記得，做所有嘢將來有機會會畀人拎返出嚟時要諗多步，當然我唔知未來，我冇水晶球，亦唔知將來社會氣候，要做好自己先。」

許廷鏗透露將會同家人旅行休假，問到佢有冇女友同行，佢自稱冇女友，而好友吳業坤身邊突然好多女神出現，許廷鏗話:「我冇佢咁多，讀書時永恒女神係林心如，所有劇我都煲哂，係我童年回憶，入行後就好欣賞劉嘉玲，好有風範同魅力攝人，視佢為學習對象。」