煲呔口口聲聲話要「做好呢份工」，其實個心已經飛咗去第二度，佢噚日去紅磡海逸豪園做家訪騷時，突然爆響口話慌自己退休後冇咁好環境，擔心將來養老住過世間屋，隨時細過𠵱家豪宅個廚房！煲呔有感而發有迹可尋，佢前兩晚去過貝沙灣VIP之夜，話唔定睇完豪宅後心郁郁。不過呢啲嘢遲啲諗未遲，今次家訪失言又冇做足功課，𤓓爆指數爆燈。
海逸豪園算係中產「上車盤」，不過對住慣禮賓府嘅煲呔嚟講，應該睇唔上眼。佢噚日家訪探望戶主梅先生時，話自己平時因工作關係接觸好多有錢佬，亦不時探訪基層，不過好少搵中產傾偈，之後佢無厘頭話有錢佬間屋好大（唔通佢想講梅生間屋細？），最奇係佢未連任就諗退休後路，自嘲第日養老間屋，可能細過大孖沙豪宅個廚房。煲呔失言，梅生梅太唔識搭嘴，因為唔明佢搞邊科。

煲呔同梅生兩公婆傾咗20分鐘左右，梅生個仔見到煲呔好興奮，成日用手篤煲呔胸前襟章。梅生有兩個細路，一個四歲，一個兩歲，煲呔叻唔切sell政績，話佢搞嘅（偽）學券制呢鋪啱用啦！點知梅太話，細路學費36,000蚊一年，過咗上限冇得資助！煲呔明顯冇做足功課，好似唔係幾信，反問：「咁貴？係全日定半日？」梅太話係半日，但佢哋唔想因為咁就轉校，因為讀緊嗰間都幾好。
𤓓爆嘅煲呔撞咗板即刻狂兜，話其實學券都幫到九成幾嘅家長，如果真係用佛利民嗰套，資助有錢人嘅學校就會俾人鬧，所以政府都好難做㗎！講教育開口夾着脷，唯有叉開話題講醫療遮醜，煲呔今勻老老實實，話香港空氣唔係幾好，生活又咁緊張，香港人長壽，都係多得香港醫療制度唔差！

煲呔走咗之後，八方問梅氏夫婦點睇。梅生話佢哋支持曾蔭權連任，但始終希望快啲一人一票普選特首，希望政府同民主派快啲傾到普選共識；梅太就話煲呔個偽學券制冇佢份都幾唔開心，政府好似唔理中產咁，最想政府大方啲，等佢哋兩個細路都得益。
另一候選人梁家傑噚日場騷係去藍田探訪長期病患者，啲病人不滿煲呔唔嚟，個個都話要選傑哥。袋巾喺網誌度話，有個16歲𡃁仔寫信畀佢，話為咗支持2012年雙普選，特登捐咗201.2蚊畀袋巾，袋巾話2012年，呢個細路已年過18歲，希望到時佢有得投票選特首。