吳綺莉、陳啟泰（Ken）今日喺尖沙嘴，宣傳有線節目《不老的傳說》，吳綺莉同Ken喺現場測試大家嘅皮膚、腿長同埋胸肌等。

吳綺莉話今次請咗好多朋友做嘉賓，好似江華同老婆麥潔文、司馬燕等，講到江華喺節目話自己情緒試過有問題，吳綺莉話幾年前江華有段時間腰傷，做唔到嘢，男人係屋企支柱，可能會擔心收入，越諗越轉牛角尖。

提到之前有雜誌都話江華有抑鬱，吳綺莉話：「佢好番好多，今次節目我都有問佢哋夫妻相處之道，因為之前江華都有傳過緋聞，但見到佢哋都有互相扶持好窩心。」

講到江華好似話自己有幻覺？佢話：「係呀，佢匿喺屋企唔出街。」知唔知佢經濟有冇問題？吳綺莉表示：「真係唔知，唔係同佢哋好熟，佢哋咁大個人，識照顧自己，可以養到兩個小朋友20幾歲，有佢生存之道。」至於吳綺莉就話自己冇試過抑鬱，但當年大肚都諗過自殺，但只係閃一閃就過。

Ken話之前幫呢個節目去沖繩拍攝，喺當地試咗海葡萄後，點知肥到186磅返嚟，佢話：「我人生未試過咁重，食咗四、五日，成個人腫晒，我諗係寒底人唔食得，我老婆都未見過我咁肥，不過返港後，就慢慢瘦番平時既170幾磅。」