人稱品姨的陳立品（原名陳慧芳），50年代入行拍粵語長片，至70年代再踩入電視圈，影視作品逾300多部，最擅演問米婆、包租婆、大妗姐、清潔阿嬸、龜婆以及三姑六婆等小人物角色，包括《上海灘》飾演丁力母親，電影《賭神》演刀仔劉德華嫲嫲等等，由於品姨經常喺港台劇集《獅子山下》演徙置區老婦等不同小人物角色，就如代表住香港一班草根階層，被視為香港人老友記，其中77年《獅子山下》之《野孩子》單元，更是品姨代表作，在海外贏得多個獎項。

除電影和電視劇，品姨更是歌神許冠傑（Sam）御用MV女主角，如阿Sam《打雀英雄傳》MV中的六嬸；《雙星報喜》節目中多個MV演出。另外，《歡樂今宵》的《品姨》環節，正是品姨擔正做主角。而陳慧嫻當年大碟《變變變》頭頂紥髻造型，亦被指係參考品姨。可惜品姨1990年7月病逝，享年79歲。

品姨有一子一女，大仔育有兩子兩女，黃宗賜正是孻孫，因而最深得品姨痛錫。四個孫仔孫女當中，就只有黃宗賜加入娛樂圈。

儘管品姨離逝20多年，黃宗賜仍清楚記得跟嫲嫲相處點滴：「佢成日捉住我睇劇本，因為佢對眼又唔係幾好，第二，佢有陣時要寫嘢，我阿嫲唔係幾識寫字，睇就識，寫字就唔係幾好，有陣時要寫低mark低啲嘢，我咪幫佢囉，同埋成日捉住我幫佢對劇本。」

眼中嫲嫲又是怎樣的一個人？黃宗賜說：「我覺得佢好叻，乜嘢都冇問題，又真係樣樣嘢都得喎！有次我記得佢去大嶼山拍戲，要佢踩雪履，佢又真係去踩雪履，後尾跌斷咗隻手。我好記得嗰次㗎，佢返到嚟跌斷咗隻手，我爸爸好嬲，嗌佢以後唔好拍啦。我唔記得佢拍咩，好似係《歡樂今宵》，後尾到阿嫲差唔多過身都病喇，都仲要去拍，人哋搵佢拍部電影，我哋唔畀佢拍之嘛。」

為何品姨如此熱愛拍戲？黃宗賜說：「佢好鍾意成班朋友，覺得拍戲好開心嘅，因為大把人陪佢，佢又鍾意講笑。」

多年來，觀眾可能只記得「品姨個孫」而不記得「黃宗賜」這名字，黃宗賜笑說：「無所謂㗎，咁我真係品姨個孫吖嘛！其實要嗌到個名都好難㗎，即係你要做到街知巷聞先噏得出你個名，但我真係未去到呢個位置。」

採訪：戴彩煥
攝影：仇志德
拍片：馮嘉銘

精選娛聞，喺晒《娛果》
http://fb.com/appledailyent