金豐鴻運代理嘅上海新盤駿豪國際,喺「沙士」肆虐期間開賣,全部六百個單位,依然可一日內沽清,早排金豐帶記者去上海睇房地產展時,順道參觀吓呢個咁好賣得嘅樓盤。我哋一班記者諗,個盤已經賣晒,重有乜好睇呢?點知畀幾個設計獨特嘅示範單位吸引住,重睇到唔捨得走㖭。
駿豪國際嘅位置同性質,都類似香港嘅會景閣,每層有三十個單位,面積只有四五百呎,全部一房間隔。不過,示範單位就大玩開放式設計,張床同浴缸並排,又或者浴室大過間房,設計反傳統,比起香港樓盤示範單位規律化嘅裝修大膽創新得多,蘭西大開眼界。
更意外嘅係,呢批單位好受內地人歡迎,想買示範單位嘅買家因為太多,搞到要以拍賣方式出售,價高者得。聽講其中一個賣到一百五十萬人民幣,呎價二千七百幾,比一般單位高三成半,貴過不少內地豪宅,亦高過香港新界樓。
靚女助陣海典軒閒情滿溢
信和屯門海典軒嘅售樓處以「水上白宮」為主題,為咗襯番個售樓處,周末特別請咗兩位外籍靚女助陣,充當model,同參觀示範單位嘅準買家影相留念。信和重安排咗專人用寶麗萊幫睇樓客影相。現場所見,靚女除咗受男士歡迎外,女士們都唔執輸,要同佢哋影番張靚相留念。
為咗配合主題,兩位模特兒嘅服裝都經過悉心揀選,係二十世紀初嘅歐洲服裝,加埋佢哋手上嘅扇同埋首飾,優雅大方,充滿宮庭色彩。除咗兩個靚女之外,重有英式茶點招呼,樣樣都襯到絕,噚日天氣雖然唔係咁好,但係都有唔少準買家睇樓歎茶點。