適逢《基本法》頒佈25周年，國務院轄下嘅全國港澳研究會理所當然搞大龍鳳宣傳吓《基本法》，噚日就喺北京搞大型論壇，法工委副主任張榮順同港澳辦前副主任陳佐洱等空群而出，為《基本法》再啟蒙搖旗吶喊，但八方同唔少花生友一樣，反而對有護法之稱、清華大學法學院長王振民言論最感興趣，事關佢建議香港居民出街，應該隨身攜帶《基本法》。

「冇民主同普選都過得好」

傳媒噚日報道王振民噚日話，《基本法》應該成為香港法治靈魂同核心，香港特區居民嘅行為，應該以《基本法》為最高指引，甚至應該「人手一冊」隨身攜帶，為特區所有政府部門同全體居民行為指南同方向定位。佢仲話呀，即使冇民主同普選，只要仲有法治，日子仲可以過、甚至過得好好，但如果冇咗法治，不管有冇民主同普選，香港繁榮穩定將不復存在。
新護法呢番「人手一冊」言論獲唔少網民熱烈回應，有人話毛語錄先係阿爺最高思想，王振民推崇《基本法》，政治不正確；另有港人好關心，如果警察查身份證冇帶《基本法》，係咪犯法先？
八方反而想分享口痕友嘅「高見」，佢話若然要對阿爺以示效忠，讀《基本法》不如剪個一式一樣基本「髮」，一來唔使帶喺身、二嚟聽唔聽話，一目了然，佢笑笑口話由護「髮」王振民操刀主理，簡直係信心嘅保證，唔知王振民有冇興趣轉型？

李八方
mailto:[email protected]