男友咀咀 雙方家長做見證
杏兒開騷預演嫁宗澤

蘋果日報 2009/12/15 00:00


胡杏兒和黃宗澤(Bosco)的戀情近年逐漸浮面,前晚杏兒在九展開騷,適逢當日是Bosco生日,壽星仔親到現場為女友打氣之餘,更走到台前獻花獻吻,逗得女友笑逐顏開,加上雙方家長在場,難怪被取笑如擺結婚酒。
雖然胡杏兒和黃宗澤一直不肯承認戀情,但早前兩人被本報踢爆到日本度假,不認不認還需認。前晚胡杏兒在九展舉行音樂會,身為男友的Bosco大方一早到場支持,兼且受到杏兒fans的歡迎,當王祖藍現身時更取笑兩人:「好似嚟飲咁,放低人情,我祝兩人百年好合、連生貴子同三年抱兩。」
empty
黃宗澤以男主人身份現身杏兒的音樂會,大方走到台前獻花獻吻。
empty
黃宗澤看足全場騷,又拿起紙牌為女友打氣。
熱舞疑似露點
適逢前日是Bosco的29歲生日,他直言:「我嚟睇騷當慶祝。」杏兒父母、姊姊、姊夫以及Bosco的媽咪及姊姊皆在場,當記者叫Bosco跟杏兒父母合照時,他卻尷尬婉拒。
前晚杏兒瞓身演出,甫開場以bratop現身,唱國語歌時更唱出一曲《我願意》,擺明憑歌寄意。她換上一套心口開窿的舞衣,勁歌熱舞之際更疑似露點。介紹嘉賓胡蓓蔚出場時,杏兒讚其歌藝出色,台下即大叫Bosco,之後杏兒甜笑說:「今日有人生日,佢今晚都有嚟到,你哋知唔知邊個?」Fans隨即大叫Bosco,杏兒率領歌迷清唱生日歌,Bosco此時拿起鮮花走到台前送給杏兒及錫了她面頰一啖,杏兒撒嬌說:「係咪應該我錫你一啖?搶晒鏡喎。」之後杏兒和MCJin合唱時主動rap說:「我都鍾意睇TVB,尤其係黃宗澤做嗰啲。」MCJin抵死和應:「Bosco條死仔執到。」
empty
杏兒甫開場穿bratop獻唱,引得粉絲狂叫。
empty
杏兒的父母(前)及姊姊、姊夫齊齊現身打氣。
騷後拍拖消夜
問到戀情是否浮面?杏兒大發嬌嗔說:「唔係,螢幕情侶啫。」問她會否再和Bosco補祝生日?她說:「我聽日要開工,不過都會再約埋成班人食飯。」此外,Bosco昨日到銅鑼灣出席無綫記者會,他透露前晚騷後和杏兒及朋友一同消夜。
採訪:馬建華、胡比
攝影:黃文成
empty
宗澤媽媽欣賞未來新抱的演出,露出滿足微笑。