熊黛林（Lynn）噚晚喺中環出席時裝活動時，一出現就被追問「造人」進度，佢笑言：「俾啲時間我哋啦，總之就順其自然。」問佢係咪會好似之前嘅宣言咁，要生4個？Lynn話：「冇，邊度趕得切，我哋時刻努力，時刻準備。」佢仲話近來忙緊運動服裝生意，同老公做嘢都忙，越近開賣日子就越忙，Lynn仲自爆：「每日要接電話同message，要處理好多嘢，我從來未試過咁憎個電話嘅！」

問到會唔會請人幫輕吓，Lynn話其實請過，有同事幫手，請咗兩個月到，但最後都係覺得自己生意都係要親力親為，結果都係自己接手。Lynn又話會做埋生招牌，又會孖住老公郭可頌影廣告告：「因為佢（郭可頌）都唔俾我同男model影，因為啲運動bra top少布啲，我哋男裝冇上衣，所以啲男model要赤裸上身着短褲咁影，可能佢唔係咁鍾意。」其實係咪唔想你睇其他男仔咋？Lynn笑言：「嗯，可能啲男model太勁喇……」勁？邊方面？

再講到Lynn嘅舊愛郭富城傳聞已添B女，Lynn聞言即刻話自己冇收到消息，乜都唔知，仲話自己唔會多事去問，咁話晒相識一場，會唔會同對方講聲恭喜咁呢？Lynn面露少許嫌棄神色咁話：「我諗唔會喇啩，冇咁嘅需要囉……」

OKOK，收到晒！