「20幾萬人睇嘅一段片得600蚊廣告，咁我靠乜嘢呀，同肥佬黎一樣，咪靠聽眾觀眾嘅支持」、「物傷其類，如果《蘋果》冇辦法立足，我哋都會死」、「喺畸形環境下點樣表達多元嘅聲音同價值？」「人生咁多色彩，做咩要分顏色？死咗咪變死屍囉⋯⋯」《蘋果》踏入25周年，但在政治封殺下，去年轉行訂閱制，由免費登記做會員、3元睇兩個月促銷，到實行常規價格每日1.68元，見證反送中運動和世紀疫潮。一年過去，記者走訪政治KOL、新入局的年輕區議員，甚至是親建制人士，他們都是《蘋果》訂戶，在習慣坐享免費資訊下，選擇付上真金白銀，且聽這些與《蘋果》同行的「老闆們」怎麼說。

記者 呂麗嬋

「《蘋果》和《壹週刊》，我都有訂閱。」如果說一場反送中運動，紅了政治KOL，劉細良應是其中之一。曾任職民主黨智囊，又在曾蔭權任特首的年代任職中央政策組顧問，今日的他，由建制到民間，是網台城寨的主持，利用網絡平台議政，又自發生產「豬鼻濾罐」防暴防疫，人氣高升。「若我靠YouTube畀廣告我，我諗我已死咗，因為我所有節目都係黃標，只要批評中共嘅抗疫政策，YouTube就將我嘅廣告攞走晒，20幾萬人睇嘅一段片得600蚊廣告，咁我靠乜嘢？同肥佬黎一樣，咪靠聽眾觀眾嘅支持，呢個係將來唔受政治權力控制嘅生存之道。」他說。

物傷其類，要突破政治封殺，劉細良說消費者的支持不可或缺：「消費者與媒體嘅關係，唔係單單你提供產品我消費，而係支持你嘅理念，呢樣嘢唔係新鮮，好早期喺法國出現第一份報紙就係咁，有共同信念嘅人走埋一齊，只是後來商業化，進入報業集團年代，大家覺得佢係一個商品，而家係返番去古典媒體嘅理念，同消費者緊密結合，成為改革社會推動社會進步嘅力量。」由突破娛樂雜誌傳統框框，到率先發展動新聞，他期望壹傳媒在兵荒馬亂的今日可以繼續生存，扮演領頭羊的角色。

「如果你話唔使錢，《大公》《文匯》依家唔使錢啦，免費報紙周街派，點解擺喺度冇人拎？親建制、重視老闆嘅利益而唔係社會民意，所以只要一日《蘋果》性格仍然係咁鮮明，仍然係企喺利益集團政治建制嘅對立面，就算佢再收貴啲，都應該支持⋯⋯市場供求也如是，物以罕為貴，9成嘅香港媒體已俾紅色資本或者親建制嘅商人收編，咁剩返落嚟嘅，就係市場裏面好稀有嘅商品。」

劉認為，今日的主流媒體，距離多元化已很遙遠。「8、90年代係多元化，左中右都有，以前香港有《工商時報》，《星島日報》同《快報》係用中華民國，而家有冇呢？而家市面只有一種媒體聲音，係1比99，喺市場真正獨立於政治權力操控嘅，其實得壹傳媒，99%都係某種程度受政治權力喺背後操控，所以呢個唔係一個多元媒體嘅選擇，而係一個政治運動，係一個支持《蘋果》嘅政治運動。」

劉直言，若《蘋果》無法立足，其他網絡平台的影響力亦會下降：「你可以話，咪睇YouTube、Facebook、Twitter同IG，但嗰啲唔係完整嘅新聞採訪。若連原材料都冇，你做YouTuber，有咩新聞可評論？有乜隱瞞都唔知，冇人去揭發，所以我覺得保住一個不受政治權力控制、獨立於政治權力以外的媒體，係香港人嘅使命。」他並指《蘋果》的存在，正是香港作為自由城市的象徵。

「唔係話我哋要鍾唔鍾意《蘋果》，佢有邊啲做得好邊啲做得唔好，香港之所以同廣州上海北京曼谷吉隆坡新加坡唔同，唔係因為我哋有摩天大廈、水深廣闊，而係我哋嘅軟件，係亞洲有悠久歷史嘅自由城市，如果冇咗呢樣嘢，我哋嘅下一代同生活喺廣州上海有乜分別？所以我話呢個係一個社會運動，亦係一個政治運動，點解我會呼籲一齊訂閱《蘋果》，無論幾多錢都好，都要支持佢走落去，就係咁嘅原因。」

遊走主流媒體及網台，劉細良表示在新媒體年代，無人可獨善其身。「香港電台危在旦夕，無綫電視係另一個中央電視台，唯一發牌電視不獲發牌，就算係商台，除咗一兩個節目，其他已全部係親建制嘅聲音，如果喺主流媒體，連呢把聲都冇，其他新媒體係咪可以咁容易fight到影響力？你都要有原材料揭露醜聞，然後大家先可以一齊去發力。」他形容《蘋果》就如航空母艦後面帶住個戰鬥群，如果航空母艦沉落海底，後面的舢舨艇仔一樣會死。

「主流媒體淪落嘅速度，比我想像中快，但係社會反彈程度，亦比我想像中大，如非有新媒體，民意真係會受權力控制。喺反修例運動中，立場、我哋、花生台，同蘋果係同一陣線，你見到真係左右到民意，所以我話物傷其類，就係咁嘅意思——如果《蘋果》唔掂，其他新媒體嘅影響力都會大幅下跌，好似《蘋果》調查到林鄭交上去北京嘅政治報告，我哋喺節目評論，令公眾關心，最終先有機會轉化成政治行動同民意。」

一場反送中運動，民意左右大局，劉細良形容是互為影響的結果。「表態人人識，林鄭嘅政治報告，我根據經驗去演繹，加我嘅睇法就變成新嘅嘢，對政府構成壓力，但你睇到《蘋果》爆嘅新聞，好多主流媒體唔會跟進，佢哋冷處理，呢個正係政府嘅策略，有啲嘢冇法冷處理，係因為新媒體，新媒體已經唔單止係影響年輕人，我哋嘅觀眾相對年紀比較大，立場新聞再後生啲，100毛就更後生，呢個根本性嘅改變，並非純粹話新媒體崛起，就下結論話唔需要主流媒體。」

網台城寨異軍突起，運動高峯時訂閲人數逾廿萬，每晚直播，收聽人數亦維持兩至三萬，一周累積的觀眾不少，但劉細良直言在YouTube平台的廣告卻被封殺，如非靠讀者捐款支持，前景一樣暗淡。「《紐約時報》有免費版同收費版，《蘋果》應更善用其他社交媒體平台，唔使擔心免費平台分薄咗原來嘅讀者，而係利用平台特色，將原材料再演繹，吸引更多人認同理念，加大訂閱嘅基數。」他認為無論免費版還是其他平台，不應只流於簡化版、懶人包，而係需要重新包裝演繹，發掘新的支持者，否則不斷流失但無新血加入，結果都只會是死路一條。

大眾主流媒體走出付費訂閱制第一步，訂閱人數是重要的收入來源，也是成敗關鍵。《蘋果》於去年4月推出免費會籍制，共招收了350萬會員，其後分階段試行付費方案，由最初3元睇兩個月，到落實每日1.68元的常規定價，若撇除外圍因素，訂閱人數隨金額呈金字塔式下降可預期，到今日仍選擇留下的讀者，既有如劉細良一類，擁抱相近理念的讀者，也有如沈旭暉，因為吸睛新聞而選擇訂購先睹為快：「我係「安心」（許志安與黃心穎出軌）嗰段時間訂閱⋯⋯」貴為國際關係學者，遊走政商界又在大學教書的沈旭暉，說已習慣付費閱讀學術論文，認同資訊有價，不介意平貴，只是值與不值的問題。

對於《蘋果》行訂閱制，沈旭暉說：「香港嘅情況比較特殊，不至完全極權，但又受到其他外在因素影響，如何令多元聲音生存？用錢support係一種，精神參與係另一種，非但《蘋果》，近9個月，好多香港人都用自己嘅力量生存下去」。他認為香港人的精神，並非完全向錢看，亦非只擔心《蘋果》是否生存到的問題。「點樣喺畸形環境下表達多元嘅聲音同價值，呢個係大家共同努力做緊嘅嘢。」他說。

訂閱制長遠能否取代廣告，成為大眾主流媒體的救命稻草，仍需拭目以待，而習慣免費資訊的年輕人，是否願掏腰包成為訂閱制下的新血，尤為重要，因為一場政治運動助燃，成功入局的90後觀塘區議員梁翊婷，不諱言在支持黃色經濟圈的前題下，選擇訂閱同樣顏色的《蘋果》，是理所當然的選擇：「一單新聞，有人去採訪拍攝剪接，消化咗再寫返出嚟，點解需專業訓練先可以做出嚟嘅產品，反而唔需畀錢呢？」

認同資訊有價，梁翊婷認為付費支持理念相近又具質素的媒體，是實踐黃色經濟圈的根本。「細個屋企係會買報紙睇，印象中由細個賣$5睇到依家$10，《蘋果》網上訂閱收$3一日，我覺得係幾合理嘅定價，值唔值在乎你覺得呢啲資訊緊唔緊要，我覺得呢啲資訊對我成長同對世界嘅了解係有幫助。」不過小妮子亦承認，身邊有朋友為慳錢，會幾個人分同一戶口，減低成本。「習慣係會變，以前我哋睇電視劇同電影，好多睇翻版，依家去訂Netflix，因為發現有啲家庭plan，同朋友share唔係好貴，唔使麻煩去搵來源，覺得性價比高就唔介意畀錢。」

消費習慣，加上共同信念和相近的政治顏色，造就《蘋果》的中堅讀者群，成為訂閱制的重要收入來源，但上水鄉議會主席侯志強，卻說付費訂閱《蘋果》無關顏色。「好嘢、優質嘅嘢，畀錢好應該。」只是，架上招牌黑超的「大主席」忙不及為口中的「好嘢」進一步詮釋：「我無話係咪《蘋果》喎。」他笑笑口補充。鄉議會總被視作親建制，同樣擁抱繁榮穩定、中國好香港好的侯志強，自言不追求「只聽啱聽嘅嘢」：「左中右我乜都睇，自己識去分析，多元化係好緊要，依家啲人就係偏埋一邊，香港先咁大問題。」

他主理的辦公室，就共訂了3份實體報紙，分別是《蘋果》、《東方》、《文匯》，訪問期間，就有人送來大叠《大紀元》。「有啲鄕議會唔畀放，《大紀元》嘛，你知咩事，送都唔要，但我就覺得冇所謂，你送到嚟隨便擺喺度。」社會分裂，這個曾現身「光復上水」示威行列，因為免費派飲品而引起關注的新界人，又自稱「唔係黃絲又唔係藍絲」：「人生咁多色彩，做咩要分顏色？死咗咪變死屍囉。」知彼才能知己，金句王大笑。

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多