日本長拍長有特備劇集《世界奇妙物語》，將會喺下星期六喺日本富士電視台播出新一集，今次都係一樣有幾個古仔組成，今次嘅演員包括西島秀俊、上位男星窪田正孝同埋靚女女星佐佐木希等。佢哋會各自主演一個故事，而當中最搞笑係佐佐木希個古仔，佢竟然因為靚而要畀美人稅！

佐佐木希做嘅《世界奇妙物語》故事就叫做《美人稅》，講日本政府因為要增加收入來源，竟然要引入美人稅，個原因係靚女一生人都會有好多着數，例如好多男人爭住請食飯、做錯嘢男上司唔會鬧或者鬧少啲等等。都幾好笑。而佐佐木希喺劇中因為係靚女被徵收高達20%嘅美人稅！簡直係一項重稅。希妹因為覺得好離譜而作出反抗，不過，畀吓畀吓，佢竟然覺得有優越感！希妹話要去認自己係美人其實都幾尷尬，仲話拍攝時片場不停爆笑㖭。