【更新梁焯滿回應】睇開《古惑仔》系列嘅電影都會諗起「浩南哥」、「山雞」等等。除咗佢哋，大家仲記唔記得邊個係「肥屍」呢？冇錯就係喺《古惑仔3之隻手遮天》入面喺球場圍「山雞」嘅「肥屍」，即係前港姐梁佩瑚胞弟。

估唔到事隔廿年「肥屍」終於唔使守球場，仲擔正自編自導兼埋做男主角，拍咩戲？仲使問，當然都係「古惑仔」題材啦！呢套名為《江湖之社團風暴》嘅電影用晒「洪興」、「東星」、「蔣生」等熟悉嘅字眼，而演員方面，仲有大佬B吳志雄、顏仟汶、梁敏儀、林雅詩、莫鎮賢等，陣容幾咁強大！

其中fb專頁「港產片共享團」仲share咗疑似係呢套電影嘅youtube trailer，而片中所見故事係講到「蔣生」(萬梓良？)返咗泰國之後，似乎就承接咗《勝者為王》 之後嘅故事。雖然係講緊香港社團故事，不過trailer背景好明顯就非常之咁大陸，仲有網民話：「點解啲收音連旁白都好似用機頭咪收咁嘅？細路仔拍功課都專業過佢。」

事後，梁焯滿回應《蘋果》話：「條預告片未修改完整o架，而且唔係我哋公司正式發佈嘅，收音部份只係備份檔案。」問到呢套戲用咗幾錢投資？佢就話：「拍戲從來都係緊㗎啦啲錢，其實如果觀眾鍾意睇，我去守番球場都得㗎！但係我嘅年紀再做o靚仔未必好睇。」

而《蘋果》仲訪問埋「港產片共享團」版主麥don鴻，佢就話：「我覺得只係老竇捧仔嘅電視電影式水平嘅戲，係認真嘅，不過都惹笑嘅，同埋『肥屍』識唔少幕後嘢，應該都幫咗呢套嘢唔少忙，仲有打大陸網絡電影市場，呢個質素已經有人睇完5-10min，戇X落搭買全片睇，唔係曾志偉都唔會話要監製《古惑仔》啦！因為大陸實大把人睇！ 對我嚟講，只係90年代尾，一堆喺大陸拍嘅電視電影而已 。」

對於trailer被評擊，梁焯滿回覆蘋果：「條預告片尚未修改完整，而且不是我們公司正式發佈的, 收音部份只係備份檔案。 拍戲從來都係緊㗎啦D錢，其實如果觀眾喜歡看，我去守番球場都得㗎，但係我嘅年紀，再做o靚仔未必好睇。」

港產片共享團FB: http://bit.ly/2g3Krsq
睇埋呢個: http://bit.ly/2euKhZY (麥don鴻9up影評)