冬至係一家人團圓嘅大日子，通常大家會圍埋一齊食個晚飯，莫非有埋煙花助慶會更加high？多名巿民報料指周五(21日)及周六(22日)連續兩日，發現有人喺元朗錦田空地上演「維港煙花滙演」翻版，煙花效果同聲響震耳欲聾，相信喺用俗稱「椰子炮」煙花先有呢種級數，不過唔係個個人都咁buy。

從事行街Sales嘅周先生表示，周六喺元朗錫降圍站崗工作，傍晚7點幾坐喺公園涼亭休息的時候，突然聽到幾下嘭嘭聲，望上嗰天變到發白，佢一度「仲以為係爆炸！」後尾先知有人放緊煙花，啲煙花效果令佢嚇呆，認為玩還玩，違法活動搞到咁大陣仗真係要考慮清楚。不過佢就話當時有架警車擺喺附近路口，但係咁大火花及巨響，車廂內阿Sir就好似無動於衷，唔知係咪呢個日子經常有人放煙花，阿Sir都睇到慣晒。

另一名居住喺元朗屋苑峻巒單位嘅王先生，周五晚上10點幾聽到有異響，走出窗台望向沙埔村的方向，先知道有人放煙花，前後兩次，每次大約維持半分鐘，由於放煙花位置同寓所相隔大約三至四百米，效果非常震撼，好似近距離睇維港煙花匯演咁，就連片中都有人不禁連爆數句「嘩嘩嘩，好誇張呀！」不過佢就驚煙花與民居太近，如果花炮口放錯方向，火舌分分鐘飛入客廳，到時就會變成火警大匯演，出事都唔知搵邊個賠。

我哋曾經問過警方，就話無收過無任何居民打九九九報案。可能大家掛住睇無人報警，如果下次真係有件咁嘅事，奉勸大家都係報定案，以免樂極生悲引起火災。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568