當年今日

知所進退 - 左丁山

蘋果日報 2009/08/17 00:00


賓架S即將退休,預備去歐洲美國旅行一輪,返嚟之後就玩吓股票,打多啲波(高爾夫),如有人約埋就去吓馬場咁話。問佢會唔會做義工,賓架S話唔想有「承諾」(commitment)纏身,因為一旦應承咗做義工,就不可中途而廢,亦唔想一曝十寒,做一日唔做一日,煩親人哋,故此要睇定啲先,退休後兩年先至再諗。兩年後,大概要旅行嘅地方都去過晒咯,唔想再遠行,發覺留在香港老家最好,但日日留在家中,恐防會悶得發慌,到時就有做義工嘅動力嘞。至於會唔會尋求第二春呀?效法退休高官下海呢?賓架S話:「搵苦嚟辛咩,我做過三間銀行,做阿二阿三好受氣,退休後轉去幫昔日客戶(銀行家轉工轉行多數如此)做財務總監,仲更加受氣!」
此日賓架S請左丁山到銀行家會所吃飯,左丁山好耐以前曾經係會員,被銀行界淘汰出局後,自然已經唔係,賓架S好快亦唔會係咯,佢嘅會籍係銀行嘅,會籍跟位唔跟人,佢離開銀行,自不然亦會失去會員資格,由其他同事頂上,以後要有老友請先至可以到置地廣場告羅士打大廈頂樓食飯。左丁山問佢可唔可以要求做榮譽會員,賓架S大笑:「面係人家畀,架係自己丟,人哋自動選我做榮譽會員,就話有面啫,自己出到聲問就認真唔識do咯,我哋做銀行成日要講合規(compliance),否則會俾金管局將軍,我退休之後,亦一定會所有動作都合規嘅!」
人要知所進退,不可對權位戀戀不捨,走咗仍然想攞着數,攞在位時嘅perks,好易清譽不保,畀人在背後講閒話,你估好好聽乎。前國家副總理吳儀退休後最有型有款,公開講明自己會「裸退」。左丁山唔多明白「裸退」係甚麼名詞、動詞,但多少明白吳儀係講一退就全退,不理世事。聽其言觀其行,吳儀果然係「裸退」,聽學術界人士講有海內外大學想頒授甚麼榮譽畀吳儀,或請佢教書,佢都一一拒絕,絕不留下尾巴,亦不在公開場合露面。十八年前吳儀係北京市副市長之時,左丁山在北京與佢見過一次面,一齊在必薩餅店食pizza,當時真係估唔到佢係如此厲害人物。