韓國人氣男團EXO嘅成員D.O.近日相當忙碌，隨咗拍新片《Swing Kids》，又要孖隊友出席頒獎禮，而組合嚟緊又會推出新碟《Universe》回歸樂壇，D.O.到時又要同隊友四圍宣傳，令粉絲相當擔心偶像嘅健康。

而D.O.加入演員行列後同唔少男星都相當老友，包括新婚人夫宋仲基、《Running Man》成員李光洙、趙寅成、金宇彬等，而咁多位哥哥都相當錫D.O.，之前D.O.喺日本開騷時，趙寅成等人就被捕獲到飛抵日本撐「細佬」D.O.。此外，上月舉行嘅「第38屆青龍電影獎頒獎禮」中，趙寅成更為未能趕到現場嘅D.O.代領新人獎，可見D.O.同一眾哥哥嘅好感情。

趙寅成除咗親自現身撐D.O.外，知道D.O.正忙於拍新片《Swing Kids》，更低調送上餐車為D.O.打氣。餐車公司日前喺Instagram上載餐車嘅相，只見餐車上掛上趙寅成臉紅嘅相外，更寫道：「為演員都敬秀和Swing Kids化妝組，還有全體工作人員應援」，相信D.O.一定大表感動。

更多韓流，喺晒《娛果》
http://fb.com/appledailyent