七月一日大遊行，有好多年青人參加，無畏無懼，講到明係中學生反二十三條，顯示年青人嘅政治勇氣。才女M與一班朋友同行，行行吓有人去咗前面，有人墮後咗，才女M一時不察，以為後面跟住嗰位男士就係老友，半轉身對住男士話：「我哋自己人……」唉吔，睇真啲，係一個陌生人，唔識嘅，覺得唔好意思。點知男士即刻回應：「今日成條街都係我哋自己人。」才女M聽咗，好感動，覺得香港人同心同德，團結一致。

遊行只係偶發事件，唔係常態。既然咁多年青人上街，不妨在此呼籲一下，滿十八歲嘅同學朋友，請你哋立即去登記做選民，今年十一月選區議員，明年選地區立法會議員。選舉先至係常態，我哋要爭取立法會全面普選，首先就要識做選民，然後帶眼識人，唔好投票畀一啲得把口猛話遊行者係俾人誤導嘅議員，我哋要用選票趕走一啲混蛋，把主張自由民主嘅人選入議會。做咗選民，就要去投票，唔好俾人唱我哋香港人政治冷感。
各位十八歲嘅年輕朋友，請立即把握機會，登記做選民，七月十六日就截止㗎嘞！有權做選民而唔做，有選舉權而唔去投票，係天下最笨之事，唔運用自己嘅權利，好易俾一啲政客賣咗豬仔。
十八歲就要學會運用選舉權，千祈千祈唔好自動放棄呀。