韓國天團BIGBANG嘅G-DRAGON（GD）上月27號入伍，並到江原道鐵原郡陸軍第3師團白骨部隊新兵教育大隊報到，接受為期五周嘅基礎軍事訓練後，將以陸軍身份服役。

由於GD入伍，令到粉絲要闊別佢21個月，粉絲自然好唔捨得啦，而粉絲因為擔心偶像嘅情況，所以就會從唔同途徑佢表達佢哋關懷之情，當中有唔少粉絲都透過寄信或者用電郵嘅形式寫信畀GD，由於每日多至過千份，令到白骨部隊嘅電郵信箱及Facebook嘅信箱都難以應付，所以噚晚白骨部隊嘅一個由現役及預備兵管理嘅Facebook賬戶就呼籲粉絲唔好再電郵信件畀GD。

當中就指因為每封電郵嘅信件都要列印出來，然後再去處理，工作人員難以每日處理大量信件再將佢分類，所以就作出呼籲，又希望粉絲留言時寫名係粉絲俾GD嘅信，方便工作人員分類及整理，並承諾會將粉絲嘅留言收集畀GD。

不過留言一出後，唔少粉絲就指摘呢個唔係白骨部隊嘅官方賬戶，又指對方係假賬戶，仲叫粉絲繼續寄信畀GD，而今日呢個白骨部隊嘅Facebook就再更新，並指唔少粉絲散佈虛假嘅事實，仲指呢度唔係BIGBANG嘅粉絲專頁，而係大韓民國第3步兵師嘅白骨部隊專頁，希望粉絲唔會做壞榜樣，喜歡GD就默默支持佢。

由於有唔少粉絲質疑呢個白骨部隊嘅Facebook賬戶，所以有粉絲更去信到國防部，並將同國防部嘅訊息公開，根據該訊息顯示，該白骨部隊Facebook唔屬於官方，而係私人運作，有指國防部已向相關部門反應。

另外，有一個20歲、跟GD（本名權志龍）同名嘅軍人權志龍，亦被GD粉絲嘅熱情而影響到，事關呢位權志龍除咗跟GD同名外，二人一樣係上月入伍白骨部隊，因而有粉絲誤以為佢係GD，透過韓國陸軍官網寄出信件，更有人用BIGBANG成員嘅名，不時向權志龍留言。

更多韓流，喺晒《娛果》
http://fb.com/appledailyent