今年樓價急漲，成交大增，代理界大豐收，均積極擴充分行，都以人流旺，或者交投多嘅屋苑為選址。不過，細行晉誠地產，就揀選交投靜嘅葵涌華景山莊開設第三分行。
晉誠張秋對蘭西話，華景確實成交唔多，每個月得嗰四五宗，但係唔少業主已經「供滿」，好大換樓潛力。晉誠就係睇中呢點，至喺呢度開分行。因為明年唔少新盤開賣，可以射客買外區新盤。
另外，屋苑現時只得中美兩大行，晉誠變成第三勢力，希望可以搶佔到三分一佔有率。重有一個原因，係屋苑商場靜，租金自然平！咁成本咪輕啲囉。
呢間分行約二百呎，月租一萬，員工五至六個，只要做到幾單成交，已經可以維到皮。
佢希望，一年營業額可以有四百萬。

領匯托市有功
中記報告，今個月樓宇買賣預料只得一萬零五百宗，比上月少兩成三，但總值六百四十五億，增四成半，今年最高。
近個零月，樓市偏靜，大手買賣唔多，買賣總值竟然可以創新高，原來因為房委會商場同停車場，賣咗畀領匯。
嗰度已經值三百二十億，佔一半，所以形成宗數減總值增唔協調現象。
扣除房委會呢項交易，今個月登記，價值最高係中環會德豐大廈地下A舖，作價三億九，中環荊威廣場商場則兩億八。至於長沙灣金華大廈地下舖位，原來都值二億三。