今日7.1，大家有冇上街?熱血藝人歐錦棠半夜留言力撐7.1遊行，佢講咗個好長嘅故事，話政府似足一個呃女上床嘅無賴，講嘢無口齒，話堆填區14年關閉，又想呃多14年。

呢個留言有啲長，但大家都請睇晒佢啦:

「有人話，想知一個城市嘅人文質素係點，睇當地嘅報紙頭條就知。
我就話，睇嗰個地方嘅電視廣告，就可以見微知著。
你睇D財務公司廣告，明明條女想買野，
但係理智話畀佢聽＂仲有好多咭數未找喎⋯＂
喺佢冇得fing錢苦埋口面嘅時候，
著住制服有天使面孔嘅貸款公司女仔出現，
＂淨係畀minpay，D息好貴㗎，不如一筆清，咁咪可以買曬心頭好囉！＂
有D甚至誇張到足不出戶，打個電話都借到錢，easycomeeasygo。
但係，佢地冇講過，一筆清之後重新借過D錢點還，
到時，咪又係要你minpay。
＂咁點見微知著？＂你問

如果你覺得以上哩類廣告係冇問題嘅，咁好正常，
因為幾乎每日，你都會喺民生大事上遇到類似情況，習以為常。
但習以為常，並不代表正常。
每次政府要市民撐施政，必先派甜頭，製造美好願景，但只係出口術，
同為咗呃女上床出盡甜言蜜語D無賴冇分別，
事後發現條仔係空心老倌想追數？唔止失身仲分分鐘周身債。
唔記得？
將軍澳堆填區話明14年關閉，而家似乎想呃多十四年；（唔倒垃圾，淨係倒建築廢料，仲大鑊，加上見識過洗街車無水乾擦製造沙漠風暴效果，為該區創造新景點）
西九拍曬心口話唔會超支，唔會？而家全部起雙飛唔該！（唔緊要，大家有份畀錢）
思歪話喺適當時候出嚟交代僭建，佢＂唔會自滿＂咗一年，我地都未等到佢個適當時候交代僭建！
仲有，仲有⋯⋯（下刪二千字）
將所有唔好嘅嘢都糖衣包裝，全部同你一筆清，然後要你慢慢minpay。
大家領夠野未？
去巨蛋，定出嚟行？今日7•1你識揀！」


上街吧!