現年34歲嘅韓片《下女誘罪》女星金敏喜，去年陷入不倫醜聞，被爆同已婚導演洪尚秀發展婚外情，洪尚秀早前和結婚31年嘅太太辦理離婚手續，因為太太唔肯離婚，所以0依家就要排期打官司。

近日金敏喜同洪尚秀又成為新聞人物，事關佢哋早前被拍得齊齊開工照，加上洪尚秀執導、金敏喜主演嘅電影《獨自一人在夜晚的海邊》入圍第67屆柏林影展競賽單元，到時佢哋亦會到當地參與盛事。而根據日前播出嘅綜藝節目《聽到傳聞Show》中，有記者就大爆金敏喜同洪尚秀去年6月爆出婚外情後，二人唔理是非，繼續甜蜜約會。

據該名記者所講，喺去年10月初，金敏喜同洪尚秀就喺京畿道某餐廳拍拖食飯，現場大部份職員根本上都認出二人，不過大家都扮作唔認得佢哋，直到有一位年輕職員，因為本身係金敏喜粉絲，所以佢就趁金敏喜準備離開時就送上麵包畀金敏喜，點知金敏喜身有屎咁，即刻好驚青咁走人，仲因為太慌張所以一度搵唔到出口位置。

同時節目又爆料話金敏喜與洪尚秀二人因為拍攝《這時對那時錯》而撻着，原先係金敏喜對洪尚秀有好感，但相處時間越長，洪尚秀亦慢慢對金敏喜產生咗感情，直到去年9月洪尚秀就決定離開自己嘅家庭。