要數問得最到肉,首推Sammi,佢問小鳳姐:「你最近有冇拍拖?好耐冇發巿喎,你要趁青春感覺戀愛。」小鳳姐反爆之前喺街遇到Sammi同許志安,兩個人飲到微醉,仲話:「我問佢上次台上送畀佢嘅戒指,有冇送畀安仔,安仔答有。其實我從未斷過拍拖,拖友係我啲歌迷。」提到大會主題「既然青春留不住,不如有請小鳳姐」,小鳳姐話:「青春境界唔係睇表面,係睇心境,咁多年我都係認真亂咁唱。」
訪問時小鳳姐話有意聯絡當年演唱會,匿喺佢魚尾裙入面嘅小朋友。問佢今次個唱有冇勁歌熱舞環節,佢話:「會考慮,同埋着迷你裙都可考慮。」至於會唔會加插棟篤笑環節,小鳳姐好謙咁話:「我講嘢好笑咩?平時我用嚟自娛引自己笑。」
撰文:馮仁昭