早幾晚嘅煙火匯演，好好睇，睇到我隔住個Mon都依然有心心眼，想當年我真係會嘩出聲。

周三（5日）晚我就老眼昏花，全晚九場只係間中收披士，完全無份威，個心或多或少都有啲唔舒服。撞正翻風又有啲雨，我呢啲唔睇天做人嘅豬兜，得件薄T-shirt當然又係成功瀨嘢，跟隊走去試咗個新鮮薑汁洗頭大法，驅風禦寒兼保心安，Go！

阿婆好薑mode，尋找驅風之寶，我估今次巫斯義都應該會老當益壯。

聽日（9日）第三場「佳知武仕」上回初上1800米，算跟得幾好。北上吸住靈氣試咗課hea閘，南下又跳課快嘅，有啲心思。13檔？今場步速唔慌快，就變咗有足夠前速去放或者跟放頭馬去跑，就算中段有馬走，要搞亂檔都唔易，外檔仲換到賠率。

第九場「赤兔寶駒」上場已經超級睇好，慳位留放再爆，最後竟然跑第二輸個鼻，我幾乎跪低咗。巫斯義再騎上陣，七檔都唔太怕塞。唯一係重咗17磅，大家可以睇吓佢到時行出嘅再判斷嗰啲係肌肉定係肥肉。

如果大賽日畀我收返多少，就唔怕畀人話係咩薑蔥蒜啦！祝大家身心荷包都暖笠笠。