已經成為人夫嘅日本型佬福山雅治，今個星期一突然宣佈娶多年地下情女友吹石一惠，震驚日本藝能界，一向對私生活非常低調嘅福山，原來喺婚後第二日就立即開工，為富士電視台嘅音樂特備節目《歌唱福山》錄影，節目仲請咗同佢合演電影《誰調換了我的父親》嘅LilyFranky、演員桐谷健太，仲有小室哲哉做嘉賓，陣強都幾強大。

雖然福山喺節目入面冇提結婚一事，但係鏡頭後個個都祝福佢，福山亦表現得相當high，仲話今次個得到幾個嘉賓喺節目入面jam歌，簡直係「好似奇蹟咁嘅節目」，原來福山有成廿年冇同小室合作過。但福山婚後唔知係咪想表現出人夫呢個身份，一向冇乜見過留鬚嘅佢，竟然留咗少少鬚，都幾罕見。

而福山嫂吹石一惠原本想喺宣佈結婚當日，同時喺自己個網誌公佈結婚消息，但係因為太多人喺佢個網誌度留言，結果搞到佢自己開唔到個網誌，遲咗兩日先至喺網誌中公佈。