今夏轉會市場已經關閉，阿仙奴都可以話係英超最後一日大輸家，既放唔到「山神」阿歷斯山齊士，亦買唔到摩納哥翼鋒沙馬士林馬，領隊雲格更加被多位阿仙奴名宿批評。

國際賽期間返咗法國休息嘅雲格，接受當地電視台訪問時，就講番買唔到林馬嘅原因。雲格話：「我哋確實係出咗1億歐元（約9.2億港元）轉會費，摩納哥亦都接受咗，不過林馬拒絕離開，佢想繼續效力摩納哥，我哋都好無奈。」雲格亦都重申，唔會放棄呢位21歲法國國腳，準備下個轉會窗再出價咁話。