黃心美宣佈分手！不過，分手對象唔係男友，係佢效力多年嘅電視台ViuTV。心美由nowTV做到ViuTV，前前後後8年半。

雖然佢喺ViuTV一直受力捧，經常被派去做大騷及節目主持，被喻為ViuTV一姐，不過，原來心美已經喺上個月離開咗ViuTV向外闖。

《蘋果》今日同心美聯絡，佢解釋同公司唔係搞到唔開心而走，而係因為經理人走，所以佢同經理人共同進退。心美話:「我11月1號離開嘅，但都要一個月前通知，我同公司係和平氣氛下分手，o依家係過冷河時期，3個月內唔可以喺其他電視台亮相。」

問佢係咪過檔無綫，同妹妹黃心穎做同事？心美話：「唔係，我意向都係做吓event司儀工作，同埋會去學吓嘢。」無綫有冇同佢接觸過？心美話冇，問如果無綫搵佢，佢又會唔會考慮？心美話:「冇諗咁多，都未出現呢個問題，所以冇諗。」

精選娛聞，喺晒《娛果》
http://fb.com/appledailyent