潘紹聰呢個「迎接」農曆七月十四日鬼門關大開嘅探靈live，原定晚上11點開live，但一開live就「出事」，搞到網民派嬲嬲，實在不好意思，其實中間…係發生咗啲事…準備開live前半小時已做過多次測試，一直都係聲音畫面冇問題，但去到踏正11點開始一刻，又唔對路…而且個羅庚支針開始不停沉針（不停自轉）...

今次鬼王潘紹聰就係向難度挑戰，去凶屋倒數迎接七月十四，《蘋果》嘅《今日ENT》作直擊報導。同行仲有兩位法師同幾位探靈團友，睇下鬼門關開之後，凶屋會有乜嘢靈異事件！

潘紹聰喺晚上11點左右嚟到呢間凶宅，佢話：「依家就係農曆七月十四日嘅子時，今日嚟到呢間凶宅，間隔比例古怪啲，有一條大走廊。呢間凶宅發生咩事呢？大約20年前有一個媽媽睇唔開，殺死自己個仔，再畏罪自殺。」

潘紹聰再為大家介紹兩位法師，問到：「個羅庚有冇問題呢？」法師就表示，發生咗沉針現象，支針不停跳動又或者各下沉，即氣埸突然轉變。

而法師仲喺奇門遁甲中之死門方向擺陣，法師表示：「死門係代表靈界嘅意思，透過時間同空間可以接觸到靈界，同時作法希望靈界可以收到。」及後法師作法為靈界超渡。

潘紹聰表示幾位探靈團友直播前已經見到「嘢」，團友表示：「我見到有半個頭伸出嚟望，喺電影下面嗰個位。」幾位團友又話感受到腰間不停有風吹。潘紹聰又話：「其實我哋身處呢間房自80年代已經不斷出現自殺情況，所以有好多（靈體）。聽講樓下嗰間都出過事，今日七月十四日氣場都特別勁。」此時，其中一位法師展示羅庚沉針情況。

而潘紹聰又拎出磁場機表示一開機已經探測到有反應，又話：「其實師傅試過一次放電話喺一個位，希望call個靈體，就嘗試到打電話上嚟，今晚係咪可以試到？」而法師叫大家一齊放電話測試，同時磁場機突然出現反應。潘紹聰又嘗試與靈界溝通。

潘紹聰問到法師其實屋入面間隔會唔亦有影響，法師表示：「其實一條大直路，而且屋內有拱形橫樑設計，係會有煞氣。而且撞正嗰個位有衰星，會特別易招惹陰靈。而且屋內唔係長時間有人，亦會較易招惹陰靈。」

此時，突然有探靈團友表示有「女人」嚟咗，磁場機不時跳動，團友話：「我好upset，我見到係個中年女人，雖然我唔識同佢溝通，但我個腦見到有畫面，有唔開心感情，見到佢吊頸畫面。」潘紹聰及團友「呼籲」靈界朋友不妨打電話嚟。

最後，問到幾位團友有咩感覺，其中一位女團友表示：「見到一幕佢自殺嘅畫面。」