美國男星沙拉保夫（ShiaLaBeouf）又惹麻煩！佢最近去咗參加德州奧斯丁音樂節，當地時間噚日晚上，佢同一位女性友人想入一家酒吧，但係保安見佢哋飲到太醉，所以唔俾佢哋入去。沙仔之後破口大罵想強行入去，但係唔成功，之後就同女性友人行開。

沙仔好似發咗癲咁喺街跑，又喺警察面前衝出馬路，警方立即警告沙仔唔好咁做，但係佢唔聽。現場人士指沙仔表現奇怪，一係就飲大咗，一係就high大咗。警方見佢咁危險，就以公共場合醉酒將佢拘捕。沙仔被鎖上手銬帶走。沙仔曾因為酗酒而入戒療所，睇嚟佢又要再入多次。