【智取大市】疫情恐慌VS現金恐慌（晉佳）
蘋果日報 2020/06/25 17:57
晉佳
適逢美國疫情升溫，如果科技股再炒過，相信宅經濟會秤先。
白宮經濟顧問納瓦羅喺香港時間周二放風取消中美貿易協議之後，即被特朗普打一巴掌否定其講法，原來係要避過美國第二波疫情急升溫嘅壞消息雙重夾擊，單係疫情升溫已令美股單日跌逾2%。還記得5月財長姆欽講過美國太遲重啟經濟會導致嚴重經濟風險，睇怕中美貿易戰同疫情同時升溫嘅話，美國金融市場絕對承受唔起。大家要記住聯儲局已打開口牌，維持市場正常運作係首要任務，不惜市場出現泡沫。
如果因為納瓦羅一句說話令美股見頂急跌，特朗普政府隨時被指摘成為美股熊市嘅罪魁禍首，政治極度不正確，喺目前特朗普民調落後之下，勢加劇影響11月選情。呢一刻，華府絕對寧願美股最終自行超買炒到泡沫爆破，都唔願意由自己出手篤爆泡沫。
美國疫情進入第二波，分析估計可能比第一轉威脅更大，Google Trends顯示「COVID-19」字眼喺美國關注度相比3月時高峯僅約一半，至於「Coronavirus」字眼關注度更加係3月高峯唔夠兩成，象徵第二波疫情引嚟嘅恐慌會比第一轉低，對市場殺傷力唔會比第一轉大。
每次大調整都有投資者驚見頂而減持，但每次調整完結，氣氛返嚟，大家又會形成現金恐慌，資金鬥快回流股市，加重股票比重，形成更急速升勢，新一轉升浪形成，炒作主題又可能會轉，繼續輪動升市。適逢美國疫情升溫，如果科技股再炒過，相信宅經濟會秤先。
晉佳
https://www.facebook.com/advanceguy1
https://www.facebook.com/advanceguy1
-----------------------------
-----------------------------