一代非常名嘴魂歸天國，港區全國人大代表鄔維庸噚晚設靈，香港殯儀館冠蓋雲集。俾佢鬧過嘅、同佢friend過嘅，或者同佢冇乜兩句嘅，都有去鞠個躬，送佢上路。至於鄔維庸嘅其中一個遺願，亦都喺喪禮上揭曉，就係成立一個以佢命名嘅基金，惠澤精神康復者。
鄔維庸嘅喪禮，受到中央同特區政府高度重視，單係140人嘅治喪委員會排頭，就相當巴閉。喺鄔醫生口中道德水平唔夠高嘅特首曾蔭權，係最早來到嘅特區高官。煲呔打住個黑煲呔，同特首夫人一齊到。曾蔭權同鄔維庸起碼有個共通點，就係大家都係天主教徒，煲呔鞠躬之後，就上前慰問鄔醫生遺孀。
鄔太整晚都好冷靜，靈堂並冇傳出哭聲。比較令人意外嘅係，俾鄔醫生批評過「思想受到前朝遺毒」嘅前政務司司長陳方安生，表現得都幾哀傷。喺丈夫陪同下，陳太留喺靈堂好耐，有時望住鄔醫生嘅遺像，有時低頭沉思。可能正如主管港台嘅廣播處處長朱培慶所講：「我哋到來，係出於一種尊敬，鄔維庸為人爽直，理念唔同係平常嘅。」八方記得，鄔醫生曾經鬧過港台製作《頭條新聞》一類「嘩眾取寵」嘅節目，浪費資源，但港台噚晚就有六個高層到場，認真尊敬。

成立基金助精神康復者

設靈嘅基恩堂不停有高官名流出出入入，除咗三司十一局大部份長官之外，仲有行會成員，地產商就有郭炳聯同呂志和，而自由黨同民建聯都派出個立法會議員致哀。泛民方面，噚晚就剩係見到民協嘅馮檢基一個人。此外，當然唔少得大量親中人士。
同係港區人大代表嘅吳康民好大感觸，佢話鄔醫生係一個少有嘅諫士，香港需要呢種口直心快嘅人，即使有時講錯說話，但係君子坦蕩蕩，鄔維庸應該受到社會歡迎先係，點都好過嗰啲口是心非嘅人。而鄔維庸會喺今日舉殯，中央會派出法功委副主任李飛出席。