我車報員同班Friend呢排行動都好一致，返工去街嗰陣，寧願走去迫巴士或者地鐵，都唔想揸部車出街；原因係咩？咪係唔想俾咁多錢油公司賺囉！自問做咗車主無10年都有8年，以前揸部車去油站入油，無記錯油價每公升都唔使10蚊，就算打爆部錢七嗰個50公升油缸，埋單都未使500蚊；但係家陣啲油價淨係有加無減，家陣最平都要收你每公升$13.5，同樣打爆一個50公升油缸，埋單要成$675，足足多咗$175！

加快減慢政府無計

間間油公司成日都話燃油入口價或期油價格上漲，即刻要加價，但當新聞話國際油價下跌嗰陣，又唔見佢哋會即刻減番俾你喎，到有傳媒追問點解唔減油價，佢哋就會話因為啲油係油價高企嗰陣入嘅，所以無得減，之但係又唔見佢哋有部份油係喺油價低落嗰陣到港，所以會減價！計落佢哋幾乎加3次價先減得1次，即係加夠你8毫先減你2毫，仲要減價好似皇恩浩蕩咁，問你死未？
講真，好多市民同我一樣，都好希望政府可以監察油公司獨有嘅「加快減慢」機制，唔使我哋一班車主捱貴油，但政府又係話俾你聽，呢啲叫自由經濟，佢哋要加我都無計；既然係咁，大家不如少啲揸車出街，幫自己荷包慳番啲囉！

記者：車報員