萬綺雯(蚊蚊)年頭同李思捷因為一齊拍劇經常攬頭攬頸而傳出緋聞，不過佢兩個對緋聞冇有怕，擺出否認同完全唔理嘅態度，拍完劇最終緋聞無咗下文，而李思捷之後又傳搭上胡杏兒，不過被指其實都係煙幕，蚊蚊同思捷仍然一直有來往，不過通常就有一大班朋友一齊做掩飾。

有雜誌今日報道話上星期五(1號)，佢哋聯同單立文等人一齊食飯，飯後眾人分別離開，雖然當時黃雨，李思捷走時負責拎遮為蚊蚊擋雨，打算一齊搭的士。其間李思捷手搭萬綺雯香肩雨中漫步，二人不時耳語，更被影到其間佢哋愈行愈埋、李思捷更拉低把遮，二人喺街頭接吻，不過張相就咁睇，都有機會係蚊蚊擰轉頭向後面，咁啱個位似同思捷錫到。

不過就算唔係錫，蚊蚊同思捷兩個人嘅行為似乎都超越咗一般朋友嘅動作，摸頸，愈行愈近，拍劇時又周不時癡到實合照，陳十三見到其實有咩反應?其實蚊蚊同思捷傳咗咁耐緋聞，陳十三一直冇親自開口回應，只係萬綺雯轉述佢老公話佢反過嚟安慰自己，仲講李思捷係受老公所托照顧自己，又講到三個好熟，李思捷曾經用自己電話同陳十三whatsapp云云。而陳十三近年一直埋頭苦幹喺辦公室度劇本，一係就返內地開戲，蚊蚊就比人影過冇工開嘅日子自己喺西貢遊蕩，上個月蚊蚊backpack去旅行，都係同朋友而唔係老公。

報道仲話知情人講李思捷對萬綺雯特別好，仲成日同人講好鍾意萬綺雯，搞到女方好迷惘。而成日同李思捷離離合合嘅春卷（王寶寶），表面兩個人係分咗手，但係經常有約會，外間都估佢地喺番埋一齊。點知上星期四，春卷突然喺Facebook留言，話為咗一件事忍受唔到，受驚、又痛哭，要拎手袋同隻狗火速離家去朋友屋企。

而蚊蚊同陳十三嘅共有微博，就未有回應呢件事，只喺噚日七夕就po咗張玫瑰花相寫住:「七夕快樂晚安喔」唔知係咪陳十三po嘅呢?