黃淑儀個仔徐肇平今日就同黃芷晴、蘇打綠鼓手史俊威等，喺鑽石山出席活動，日前《蘋果》爆徐肇平同蔡思貝撻着(新聞連結： http://bit.ly/2trkqsC )，記者恭喜徐肇平有新戀情，佢話：「媽咪都有send條link畀我，見我上新聞佢就想通知我，我哋係好朋友，o依家我冇拍拖。」

問到佢同蔡思貝係咪成日約會？肇平話：「我哋好少見，絕對唔係拍拖，佢個人好nice。」有指因為撻着，搞到蔡思貝遭男友麥秋成狠撇，肇平就解畫話：「希望唔係啦，我都好鍾意麥秋成，大家都係朋友。」咁有冇諗過追求思貝？肇平就大讚對方話：「唔追，做朋友係啱，佢好outgoing，好外國嘅感覺，喺香港少遇到呢啲女仔。」

講到思貝出名鍾意電男仔，問肇平有冇畀佢電到？佢就咁答：「可能大家睇法有少少唔同，大家出去玩，攬一攬好正常，但喺香港就覺得有啲嘢，得啖笑。可能人哋會覺得係flirt，但我覺得好正常。」自認單身嘅肇平就話天氣太熱，要留喺屋企抖暑，等到天氣凍啲先出去識女仔。

另外，芷晴就話想出自家製蛋糕，之前就親手整咗個足球蛋糕，第一個就畀爸爸黃日華食，老豆都畀100分。