近排樓市交投呆滯，除咗發展商頭痕，地產代理亦叫晒救命。作為唯一上市嘅本地物業代理美聯集團（1200），大老闆黃建業可謂內外受困，一方面要諗計谷生意，另一方面，更要提防大股東地位被神秘人取代。

股壇牛人持股8.5%

所謂神秘人，係一個寶號叫梁向榮嘅人物，梁生上個禮拜三至禮拜五，斥資7427萬元，逆市狂掃2902.4萬股美聯，平均價大概每股2.56元。本來有人捧場托起股價係好事，但佢嘅持股量由4.54%激增至8.5%，一躍成為美聯第四大股東；比起大股東兼主席黃建業嘅10.09%，只差1.59%或1108萬股。
華華問過好多代理朋友，都唔知道呢位梁生係乜水，反而叫華華起吓佢底，費事萬一改朝換代，對新老闆乜都唔知就弊傢伙。經過一番打探，原來梁向榮有香港證券界「牛人」稱號，第一桶金亦由炒股開始，近一兩年至轉攻內地物業，去年初以7500萬銀買入廣東開平金僑城同華僑大廈，令佢聲名大噪。

炒股起家轉戰內地物業

梁向榮50年代移居香港，70年代投身股海，之後設立咗香港向榮投資有限公司，兼出任董事長。梁氏為人低調，外界唔多清楚佢嘅實際財富，不過，梁生曾經喺一個財經講座上晒命話：「若國家要培養我，至少要一個億」，由此可推算他縱橫港股幾十年間，所交學費相當昂貴。佢又透露最經典一役，賺到一個金僑城嘅價值，即係幾千萬銀。
今次大手增持美聯，是敵是友仲未知，不過肯定嘅係梁氏財技了得，以噚日美聯收報3.17元計，唔夠一個禮拜，佢增持嘅股份賬面已經賺咗1770萬。
李華華
mailto:[email protected]