當年今日
關於我們

【名家優先場】咖喱牛腩:習近平世盃夢碎?

蘋果日報 2016/01/20 06:00

名家優先場咖喱牛腩

中國奧運隊喺U23亞洲盃出局,連敍利亞都唔夠打,睇嚟習近平想見證國足踢世盃決賽周嘅足球夢都凍個水嘞。計番個年齡,呢班國奧應該係國足進軍2022年世盃嘅主力,但除咗廖力生嘅罰球令人留下印象之外,其他都難以接班。

國家主席習近平鍾意足球,係人都知;上有好者,下必甚焉,自從佢做咗國家副主席後,大搞足球外交,中國球壇就開始蓬勃起來,最具代表性嘅係恒大喺2010年入主廣州隊。恒大仲喺習近平接任國家主席嗰年、即係2013年,拎咗個亞冠盃返嚟。呢兩年中超越嚟越有錢,睇嚟都係因為上有好者,所以班有錢佬就爭相扔錢發展足球。截至禮拜二,今個冬季轉會窗轉會費最高嘅15單轉會入面,竟然有六單係來自中國球會,唔單止中超群雄,連踢中甲嘅天津權健都有份,真係有錢到暈。

按慣例,中共領導人係做10年,所以習近平應該會喺2023年退落嚟。由於國足出線2018年世盃嘅機會都名存實亡,如果佢想喺任內睇到中國踢世盃,就只有寄望2022年。當外圍賽2019年開始踢,正常鄭智都應該掛咗靴,要靠張稀哲、武磊呢代撐起,但睇嚟都唔太掂。再往細一輩睇,就要靠呢支國奧隊,點知真係一山還有一山低。其實,小弟最擔心唔係習近平無法圓夢,而係當佢七年後淡出領導人之後,人走茶涼,中國足球成為棄兒。如果下任領導人原來鍾意籃球,啲有錢佬唔搞足球,全部走晒去搞籃球的話,到時中國足球真係唔知變成點!

文:咖喱

體蘋果facebook專頁↓↓↓
http://fb.com/appledailysports