毛舜筠、凌文龍、劉美君、余安安、江欣燕、温碧霞、周秀娜等今晚到又一城出席《黃金花》慈善首映，毛姐指囡囡睇完套戲覺得好感人，喊咗兩次。

問毛姐可有留意黃秋生跟失散多年親人相認一事？（新聞連結： https://bit.ly/2DWlO7G ）毛姐話有留意：「覺得得意，好特別同好感動，隔咗咁多年可以搵番失散多年親人係奇蹟，唔知秋生知唔知自己有兄弟，同埋個感覺係點，自己都想問吓佢。」

至於曾經喺同秋生做過戲中夫妻嘅余安安，就話有傳短訊恭喜秋生，對方都有用短訊覆佢話多謝。余安安話自己身上雖然未發生過呢啲事，但好明白秋生心情，放低咗包袱。

仲有同場嘅周秀娜，喺下個月舉行嘅香港電影金像獎中，有份提名女主角，同毛姐爭獎，問佢今晚係專程去觀摩同有冇準備紙巾，以防自己感動流淚？娜姐話：「有呀，我好眼淺，今日都袋定紙巾。至於獎嘅嘢就無諗，但嚟緊會去試金像獎嘅衫。」
　　
精選娛聞，喺晒《娛果》
http://fb.com/appledailyent