側田一連兩場紅館騷，噚晚尾場，有小肥、陳柏宇同老婆、林奕匡同老婆、何雁詩、連詩雅、肥媽、側田媽咪同側田女友、崔建邦、崔建邦前女友陳嘉莉同現任男友張建聲等捧場，陳慧琳(Kelly)擔任表演嘉賓。

側田同12位女舞蹈員大跳辣身舞，之後就除抵頂帽露出光頭抹汗，佢邊除邊話：「我除帽都一樣效果。」壓軸出場嘅Kelly甫亮相，側田即刻企上個木箱上面，然後笑話：「我終於高過你。我知你好忙，你o依家係媽媽。」之後側田行番落嚟，Kelly就講笑話：「你企番呢嚿嘢(指住木箱)。」然後佢就笑住回應：「瞓晒覺啦！咁晏，我今日嚟係恭喜你第七次喺紅館開演唱會，我相信係一項紀錄。我每次見到側田都覺得佢，由頭到腳都有一陣味，係音樂味，好有吸引力，樂壇好需要你。」

完騷之後，側田出席慶功時話之前用咗兩個星期減咗7磅，o依家終於可以狂食。講到同12位女舞蹈員大跳辣身舞兼被摸，側田笑話：「現實中好少，今次free啲，全女班好正，我亦好放鬆。」側田喺台上唱咗首《It might be you》送畀女友，不過佢就話唔想講太多感情事：「以前太高調講，散咗之後覺得好戇居，人哋又唔知，影到我同第二個就以為我偷食，所以要低調。」

第一晚嘉賓係容祖兒，而第二晚就係陳慧琳，兩位都係天后級，側田話：「我同師兄(劉浩龍)好friend，有次喺朋友party撞到，我親自邀請佢。而Kelly，我就幫過佢監製歌曲，當時雷頌德唔得閒，仲記得佢錄完歌之後，我叫佢再錄多次，佢一副唔耐煩嘅樣，不過可能佢已經唔記得。」講到台上除帽露光頭，側田：「我成日除帽，公開少啲，都應該放開吓，我拍MV同打波都有除，捉番自己嘅年齡心態，後生時就會自卑啲，o依家大家可能有日會喺條街見到我除帽。」

更多娛聞，喺晒《娛果》
http://fb.com/appledailyent