當年今日
關於我們

新蒲崗
歎蛋撻擦羊肉天光食到天黑

蘋果日報 2003/01/25 00:00


新蒲崗,白晝靜得可以,但愈夜愈熱鬧。
孤單一人,走到新蒲崗廣場閒逛,再往老牌冰室叫了件蛋撻和咖啡,坐上一天半日,幸而老闆並沒有施以白眼。晚一點,約了大夥兒柴娃娃開開心心食羊肉,食飽酒癮發,再到酒吧買醉兼唱K,還是不想回家,打晚通宵桌球,又如何?
記者:陳漢榮
攝影:彭自維


老舖有幾老?
早餐至旺場
兩代經營老牌冰室
老闆姓羅,子承父業,人靜,少說話,彷彿與冰室融為一體:「多數做老街坊生意,夥計同客人好熟絡,大家已經係老朋友,班熟客就係貪呢度夠靜,唔似得其他茶餐廳咁,人流複雜,嘈喧巴閉。」新昌很有性格,堅持不賣炒粉麵飯:「42年前,老爹決定做食肆,有客做客,冇客自己吔!冇諗過愈做愈旺,旺到根本做唔切,都係簡簡單單淨賣咖啡奶茶、蛋撻麵包算嘞!」望着老舖,一桌一椅皆有感情在,羅生抽着煙,笑笑口說:「生意夠做就算,做人要知足。」
麵包日賣700個
女士們見到就怕的鮮牛油,羅先生卻說:「菠蘿油,乜油物油,梗要夾塊鮮牛油至好味,怕肥咪食,怨自己無口福囉。」豬仔包、提子包、香腸包、火腿蛋包……每日新鮮出爐,絕無隔夜貨,他自豪地說:「麵包之嘛,梗要新鮮,咁就一定好食。」。每個$2至$3。
蛋撻日賣600個
$3一件蛋撻與$9一杯咖啡奶茶,從來是絕配:「蛋撻好好賣,好多人預訂,有人重專登揸車嚟買。」問有何沖茶秘訣,老夥計余伯伯答:「絲襪咖啡茶用最好的黑白奶嚟沖,唔用隔夜茶渣,又香又滑。」
20年熟客食出感情
我幫襯足20年,每日唔食件出爐蛋撻,梗係唔知點咁。
店名:新昌茶餐廳
電話:23215347
地址:新蒲崗爵祿街58號地下
營業時間:上午六時至晚上七時
寒夜客食場
羊癡賣羊羊肉專門店
老闆五十有九,喜歡別人喚他「螺仔」,專賣東山羊:「鍾意食乜就賣乜,我係羊癡,可以話畀你聽,食東山嶺嫩草大的羊仔最和味,肉嫩兼唔羶。」螺仔有專人由大陸運羊來港,每日不過四五隻,吃到的保證是新鮮貨:「一羊四食,由頭至尾食晒落肚,唔好嘥料。大班朋友圍埋食羊,烚吓烚吓,飲吓啤酒,氣氛好、味道好,咁先至係真正嘅『和味』嘛!」
螺仔教你由頭食到尾
東山羊套餐$250
羊頭腳湯
羊頭羊腳等剩餘物也不浪費,以天麻、黨參、杞子、淮山等藥材熬成湯,一口暖遍全身。
椒鹽羊排
羊排是名副其實的「排」,少肉,椒鹽煮,佐酒一流。
白灼羊腩
腩肉最嫩滑,用十多種藥材熬成的白滷水白灼,一熟即起,不羶。
燒燜羊腩煲
斬件羊腿,用柱侯醬燜至少30分鐘,肉固然好吃,但羊腿骨髓才是精華所在。
混醬辟羶
辟羶醬料有香辣的蒜茸沙薑醬,還有酸辣的蒜茸辣醋醬。
食客有嘢講
至愛白灼羊腩,啖啖嫩肉,無吹水,食完成身暖晒。
店名:和味館
電話:23206920
地址:新蒲崗彩虹道72號地下
營業時間:晚上六時至凌晨四時