2019年對於英健朗（小占）而言，可謂感受極深，年初毅然與ViuTV解約，走去參加自家製節目《全民造星II》，誰不知連自己友都無情講，他說：「呢一年對我有好多唔同嘅嘢發生，參加《造星II》的確令到我有好大轉變，嗰陣我推晒啲job，點知第一round出局，好似冇咗全世界，down咗好耐，《造星》仔有安慰我，監製又話會搵番我。之後突然有念頭，既然有啲嘢係控制唔到，不如試吓做一啲自己鍾意做嘅嘢，改變吓自己嘅心態，唔成功都好，起碼叫做試過，再有開頻道念頭，真心希望畀多啲歡樂大家，當然現實啲講，我都希望可以有啲人識自己，始終我都鍾意做呢行。」

亦因為這原因，小占在父母的建議下，返回護士行列：「嗰陣傾咗好耐，佢哋覺得唔穩定，之後見到請人，病房勁缺人，咪入去做part time，而家主要係照顧嚴重智障嘅人。雖然人手勁唔夠，一更3個護士對50個病人，好恐怖，不過唔知點解，見到啲病人好治癒，可能佢哋成日笑，好似大BB，好cute，望住佢哋會好開心，辛苦啲都值得。」

最重要的是，小占現階段多了一份使命感：「而家啲人知我係精神科護士，好多人喺IG inbox我話想死，唔知真定假，又或者想引人注意，但係喺我立場你有好嚴重問題。真正想自殺係唔會話你知，好多時收收埋埋，可以若無其事好開心咁一齊食飯，但係第二日就會去咗，呢啲就算好有經驗嘅人都未必可以察覺，所以我覺得唔好攞呢啲講笑。我唔理佢真定假，會慢慢同佢傾，起碼呢刻仲喺度，太嚴重搵社工，打去熱線傾吓偈，攞番啲專業意見。」他更說：「其實好多人寧願搵陌生人傾偈，都唔敢搵朋友傾，一來怕拖累人、畀咗啲負能量出去。二來又可能覺得佢未必幫到手，講咗都冇反應，我明好難察覺到，不過真係要多啲理吓身邊嘅人，尤其係呢個時勢，唔好剩係識得笑佢。假如真係唔知點傾，不如學識接受，其實好多嘢係要試代入對方嘅位置去諗，當你唔開心，但係點解身邊啲人又好開心，你咪嘗試去諗吓，係好難，不過都要試吓行出嚟，去吓唔同地方，試吓新嘢，試得多，見得多，慢慢會感染到開心嘅地方。」

撰文：唐琛悠
攝影：陳慧安
場地提供：The AIR (The ONE)

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇