當年今日
關於我們

家人與寠意見不合 社署接手監護
蔡國權返港養傷遭隔離

蘋果日報 2004/01/10 00:00


前年撞車受重傷的蔡國權,前日在東莞接受完治療返港,但他不能立即回家團聚,而是被社署安排入住護養院,並要隔離七十二小時,令到蔡國權太太極度不滿,力斥變相軟禁夫婿行為不人道。
五十二歲的蔡國權,前年年尾在東莞發生嚴重車禍受傷,雖然他現時精神不錯,可以走動、說話及辨認家人朋友,但記憶力尚未完全康復,目前仍要接受治療。原來,蔡國權的太太與家人,一直就蔡國權治療安排上意見分歧,結果去年八月雙方在力爭蔡國權的監護權下,監護委員會決定將監護權暫交社會福利署處理。

不准返家團聚
之後,蔡國權前往東莞虎門益壽山莊接受為期約五個月的治療,至前日下午返港後,即被社署安排入住沙田慈氏護養院,院方並要求蔡國權在護養院內一特別病房先行隔離七十二小時,此舉令蔡太極度不滿。
蔡國權太太前晚向記者泣訴說:「我先生𠵱家精神狀態好好,佢自從出事之後,已經有成年幾冇返過屋企,𠵱家佢自己都出聲話想返屋企,點解唔畀我哋一家團聚?佢返嚟時check過冇發燒,點解要安排佢住喺隔離病房隔離七十二小時,咁做法好唔人道,好似軟禁佢咁,對我先生好唔尊重啫!

病房分隔兒戲
「其實嗰間所謂隔離病房,根本好兒戲,只係用透明膠布同膠條圍住,佢好想返屋企,我同社署反映,話不如返自己屋企自我隔離,但負責嗰位姓陳嘅社工話唔可以……點解好地地要拆散我哋兩公婆啫?」蔡太表示計劃發律師信給該名社工及有關部門,甚至向監護委員會作出投訴,希望還夫婿一個公道。
而蔡太胞妹昨日亦為胞姊抱不平說:「我姐姐同夫家嘅人關係一向唔係咁好,𠵱家院方規定每個病人每日只准有兩名親友探訪,今日佢妹妹同另一位家人用咗呢兩個名額,我姐姐想見吓自己丈夫都唔得啦!咁做法好殘忍啫!」
安排上冇共識
對於蔡太指摘,社署發言人昨回覆說:「我哋只可以講,蔡生係經醫生診斷過精神狀況,認為佢冇自理能力,要人照顧,由於當事人嘅家人唔能夠對有關蔡生嘅安排達成共識,所以監護委員會決定將監護權暫交社署;而今次蔡生返嚟前,我哋曾經同兩邊家人聯絡,但未能喺安排上有共識,所以提議將蔡生暫時安排住護養院。」
而沙田慈氏護養院則表示基於防感染控制原因,所有新轉院及入院病人均會被安排在特定地區內觀察七十二小時,而根據醫管局的防感染控制指引,探病時間每日六小時,每位病人每日最多可有兩名訪客,院方在病人入院前已向病人家屬解釋有關安排,蔡國權家屬亦表示接納。
採訪、攝影:戴彩煥、娛樂突發組
empty
蔡國權入住的病房只以透明膠布條包圍。
empty
蔡國權太太前晚向記者投訴對社署及院方種種不滿。
empty
對於剛接受完手術的病人跟蔡國權住同一病房,院方未有詳細解釋。