喺4月份華華曾經提過，內地新華網按06年度年報統計咗1254間上市公司嘅高管人工，平保四個高層包辦晒千萬年薪嘅席位，最多係首席保險業務執行官梁家駒，人工係1710萬。
不過，今年形勢可能會唔同，因為萬科推出嘅股票激勵計劃，令到董事長王石嘅人工，隨時會坐火箭咁升逾10倍，年薪可能近6000萬，登上內地打工皇帝寶座。

萬科係中國證監會發佈「上市公司股權激勵管理辦法」以嚟，第一間獲批嘅主板上市公司。聽講萬科嘅股票激勵計劃，以06至08年為第一期，若果呢3年每年業績都能達標，就會按嗰年增加嘅淨利潤金額一個百分比，買入公司嘅股票，若今年萬科嘅平均股價高過舊年，就會攞啲股票派畀有份分嘅員工。
喺呢個計劃下，萬科舊年總共買入2897萬股萬科股份，以王石佔10%計算，收到嘅激勵獎金，就有289.7萬股，以上個禮拜五嘅收市價19.1元計算，約值5533.27萬，再加埋佢本來嘅人工（06年年報顯示係422萬），一年就有近6000萬落袋，雖然金額同香港嘅打工皇帝和黃大班霍建寧年薪逾億，仲有一大段距離，但對內地打工仔嚟講，已經係一個神話嘞。

萬科今年首季實現淨利潤6.12349億，比舊年同期勁升49.27%，咁股價又點會差得去邊呢？萬科股價喺06年第一個交易日（1月4號）收4.66元，今年第一個交易日（1月4號）收15.48元，上禮拜五收19.1元，咁睇啲激勵獎金肯定冇走雞啦。
不過，華華好有興趣想知，計劃中仲有嗰90%激勵獎金（值4.9799億），究竟由幾多人瓜分？呢班員工肯定今年好肥仔啦。
[email protected]