侍仔：茶餐廳近排生意愈嚟愈差，世界盃嗰陣已經蝕唔少，𠵱家隔籬間老M又賣埋飯，愈嚟愈難做。
招積域：你老細冇諗計咩？
菠蘿文：再唔係好似其他老細咁，自己一間舖，之後就係咁靠店舖買賣搵錢。得一間總店，死就真係死㗎啦，你話晒係股東之一，出吓計仔。
侍仔：其實我哋都仲有一個舖位放租俾人，不如收番佢，將呢間租俾人啦，呢間舖值租好多。
菠蘿文：你真係學咗熱刺老細咁諗，買咗溫布萊球場之後，每當有盃賽同國際賽，就租番俾英格蘭足總收錢呀？
招積域：如果成功就發達囉，溫布萊變做自己主場，場場波有80,000人入場，又收英格蘭足總租用費，又有電視轉播費，收多幾瓣錢。
侍仔：買舖都要問銀行借錢啦，溫布萊應該值唔少啩，熱刺就咁要負巨債，我覺得唔抵囉，冇人擔保場場都爆滿，有一次半次得4、5萬人都難睇啦。營運唔使錢嘅，場地保養又係免費㗎？