【逆權運動●採訪手記】當出路在太平山另一邊 示威者：我只相信同行手足！
蘋果日報 2019/09/30 00:26
採訪手記
佘錦洪攝
事情要由那個路口開始講起。
晚上接近七時，數百名黑衣人聚集在路口猶豫不決。下去，是跑馬地的老路，上次灣仔大逃亡已經試過；上去，是越過山頭向香港仔方向。
「唔好再拖啦！下面有狗，我就會上去，要跟就一齊行啦。」忽然有聲音傳來，為無法抉擇的人們指出方向，一行人於是浩浩蕩蕩出發。
「要點行啊？」「唔知啊，行咗先啦。」
大概運輸署的官員從來沒有想過，在幾乎只有高檔轎車出入的高尚住宅區，會有一班年輕人為躲避警察追捕，氣來氣喘集體爬上半山。行人路只有一人窄，更多的人要走出馬路，一度阻礙往來交通。
「有冇人去南區啊？」「我去北角啊，搵兩個上車啦。」「我過海啊。」預想中鬼哭神號的響安聲遲遲未見蹤影，反而有人拉下車窗，主動詢問是否需要義載。
「女仔走先，有『文具』嘅走先。」面對隨時而至的搜捕，在場人士第一時間不是爭先恐後上車，而是將機會讓予其他看似更有需要的手足。有一位相信歸家路途較為遙遠的女生，被數名同行女伴合力趕上僅餘一個位置的義載後座，「一齊走啦！」「冇咁多位啊，你返到去要話我哋知啊。」
再少路人的街角，總是會有巴士站。眼見有巴士埋站，自覺身上相對「乾淨」的人此時亦連忙登上車門。再走一段路，有熟悉環境的人打算為在場人士指路，但話口未完，一輛衝鋒車從眾人身邊駛過，雖然未有停留，但所有人心中或多或少冒出一股涼意。
「喂前面好多警察啊，大家小心。」有駛來的司機提醒，正式打消繞圈回到跑馬地的念頭，一時間眾人再度躊躇。
「唔好等啦，頭先架狗車可能會報話成班人喺呢度架，行啦！」有人選擇截的士離開，有人則決定走回上一個路口的巴士站等車走，最終連同記者在內，只有十人繼續前進。
一路無話，順利轉入香港仔方向，沿途無追捕、無截查，我想大概是正在銅鑼灣推進的警察，根本毫不在意這群落單的「暴徒」。
「點解頭先咁多人上義載你唔一齊上？我見你都冇Gear，點解又唔上巴士？的士呢？」我問一直走在後邊的男生。「的士邊有錢啊。義載一嚟我唔想麻煩到人，而且而家成日都話有假義載，有狗扮家長，你唔知車你嘅係邊個，一陣原來有cam影錄低晒又送你返差館。巴士更加唔好諗啦，上次先成車人俾人拉晒。」
「你對人都好冇信任喎，但你又跟住一齊行？你唔怕有『鬼』咩？」「咁都話晒都一齊走上嚟，都行到呢度咯，寧願信手足啦。」
我又走上隊頭，找帶頭的男生搭話。
「點解頭先決定要行上嚟啊？」「四圍都有狗，上山係唯一一條路，走遲兩步或者行返落去，一早俾人圍住啦。上次行出機場都係咁行啦。」
「你平時都係行到好前？」行事決斷，我以為他一定是「衝衝子」一員。「我唔係和理非，但又未去到衝嗰啲。呢啲嘢全部都係逼出嚟嘅，你唔係逼到埋牆角，邊個會還拖吖？」
花兩個小時，由銅鑼灣翻過半個山頭，南區是這趟夜山的終點站。
「小心啲啦。」「聽日抖吓啦！」「返工啊！」「三罷啊！」「得喇，星期二見啦。」
兄弟爬山，有時同路，有時又各散東西，這種和而不同的自由大概是這場運動最核心的價值。
記者：佘錦洪