排長龍······
香港人成日以為排長龍就係好嘢，我試過幾間都覺得「人云亦云」人排我又排而已。
「棋哥」又係一間排長龍嘅燒鵝店，於是約埋幾個燒鵝精去試試。
其實「棋哥」乃係筲箕灣寶文街「新光燒鵝餐室」嘅分店，「新光」個名太普通，所以當有班年輕人和「棋哥」去天后分店，亦用咗「棋哥」嘅名。
當晚打 8號風球，仍然排大隊，店內坐滿人，燒味不斷出爐，老闆員工忙個不停。

食物

全件事絕對 overrated，燒鵝同好食扯不上關係，皮厚唔脆反而係有少少韌。冇鵝味，醃得亦冇味，得個「肥」字。
叉燒係兒時叉燒切到薄薄那款，普通極。燒腩仔，不喜歡這個切法，當然遠遠不及「永合隆」嘅一半啦。
例湯淡而冇味，瀨粉嘅湯底亦係淡而冇味。

燒鵝分析：

1）　皮
為何脆皮？
一定係上鵝皮嘅水唔同。如果落得多麥芽糖，濃啲就要用慢啲嘅火燒，不然就好似燶，通常要燒 60-80分鐘，皮自然就脆一點。
如果麥芽糖稀，只要燒 40分鐘便可，皮本來都脆，只要放一回便皺皮。

脆皮：如一樂、深井 90%的燒鵝、永和……
皺皮：如鏞記、甘牌、太興……

　

2）　味道
兒時所有燒鴨、燒鵝都用醬醃內殼，食起上來，內外都有味， good to the last bite。
現時好多用淮鹽、糖……去醃，唔用醬的，所以淡而冇味，鵝肉又厚，乜味都冇，只靠燒汁，唔好食！

　

3）　最好食的
首選已不存在、以前在油麻地吳松街的「新兜記」超咗大家十班。而家最好食的店在澳門 Crown Hotel內的譽瓏軒，香的！好食的！

在香港，現時「陸羽」每日都燒三、兩隻，亦非常好食。西貢「永和海鮮酒家」的燒鵝，熱辣辣，又好味，係舊時「海霸」的師傅。
兄弟幫「甘牌」絕對比「鏞記」好食。如果深井，首選「能記」，仲有一個秘密地點，可能大家都知佢有正燒鵝食，就係佐敦新寶廣場 2樓嘅「不倒翁」，咪以為佢淨係食打邊爐，佐敦呢間有大燒房，啲燒鵝非常正的。第二間「不倒翁」冇燒鵝食㗎。
食完以上呢啲店，你一定會更加明燒鵝點樣叫好食。

地址：天后電氣道 79-81號地下
電話： 2703 0628

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。