寫完篇《小貓挑戰大老虎》，白水泉來電：「喂，有人話你即係《壹週刊》嗰個宗菁華，你點解會喺上期寫錯梁伯韜呀？你話番薯梁過去從冇幫花旗佬打過工，家吓打過，可以進入另一個新階段……」
一聽人哋話左丁山係宗菁華就把幾火，大佬呀，左丁山澄清過幾次，話明宗菁華另有其人，宗先生位高權重，生活優游，隨時可以退休，丟下枝筆唔寫，左丁山有乜資格同佢比呀，如果我有佢一半咁威，都唔使寫嘢獻世啦。

於是向白水泉出火，噴到佢一面屁。白水泉俾我鬧死，冇嬲噃，年紀細過我，佢話受罵幾句，一啲都無所謂，白水泉講：「講番番薯梁，佢以前有打過美國佬工㗎，喺Citibank做過，你應該記得。」當然記得。梁伯韜與師傅袁天凡曾被杜輝廉招聘入唯高達，當時唯高達俾萬國寶通收購咗，後台實力大增，於是杜輝廉班齊人馬，搶獲多利生意。八七年股災之前，杜袁梁三人做咗套好戲，幫長實集資一百億元，哄動一時，嗰陣時佢哋三位嘅老頂係邊個呢？就係萬國寶通嘅InvestmentBank阿頭梁錦松！
世界輪流轉，梁伯韜做所羅門美邦阿頭，隸屬花旗集團（Citigroup），與Citibank（花旗銀行）始終有緣。白水泉話宗菁華寫錯，小事啫，人哋要為陳寶蓮遺照寫一篇長文，忙得滯，一時之間唔記得啫。