今日9月9號，除咗係長長久久嘅日子，亦係視后胡定欣嘅36歲生日。

日前預告會同「胡說八道會」班姊妹慶祝嘅定欣（新聞連結： http://bit.ly/2wPaZ7T ），喺開P前，就同埋姊妹，即係胡杏兒、李施嬅、姚子羚、黃智雯及「豹嫂」胡蓓蔚開工先，佢哋喺中環出席佢哋之前去澳洲拍嗰個旅遊特輯嘅記者會，dress code係紅裙，不過，不嬲走喺潮流嘅尖啄嘅豹嫂好醒目咁揀咗一條有印花紋嘅，至於壽星女定欣呢，着咗件暗暗帶少少桃紅色嘅西裝褸，重點係：中空上陣！性感程度即時加分，連有料之人李施嬅着吊帶低胸開叉裙都唔夠壽星女撼。

又，唔知係咪咁，所以見到準媽咪胡杏兒眼甘甘咁望住定欣個心口，仲伸手去掂吓咁……

入番正題，話晒今日係定欣生日，準備蛋糕慶祝呢啲唔少得，佢嗰5位姊妹特別送上「婚戒」俾定欣要佢「嫁」俾「胡說八道會」，話係意味住六姊妹結拜同祝定欣明年嫁得出，至於家陣喺《同盟》中同定欣合演嘅姚子羚，仲親製整咗6人嘅頭像蛋糕。定欣見到咁嘅陣勢，感動就梗啦！仲喊出嚟，佢哽咽住話六姊妹係一家人，仲講到話下世投胎，就算唔係做人，都要喺埋一齊。

再講到今晚個生日P，話會以懷舊做主題，仲係豹嫂提議嘅，因為佢哋喺澳洲買咗好多復古裙，今晚可以着，佢哋仲特登去配啲衫、飾物同鞋等等，定欣仲被爆為咗今晚個生日P，花時間同心思打扮比去台慶時更多。